LECCIÓN 13
Timoteo, dulemar bendagbidaed
Timoteo, dulemar bendagged yeer iddodaed. Emar bendaggega bule digga naddae. Aagala Timoteo yeer iddodii gusad. ¿Be wisgubie doagi Timoteo?...
Timoteo e muu, e nanbo, Jehová igargi Timoteo odurdasmalad
Timoteo Listra neggweburgi dungusad. Anba bibbigwa unni e muu Loida, e nan Eunicebo Jehová igargi na Timoteo odurdagsamalad. Degsoggu anba bibbigwa Timoteo bad Jehová igargi dulemar odurdagbi guarmogad.
Timoteo sabbingusgua Pablo ega soggalid, baid neggweburse an dulemarga Bab igargi sunmagnasoggarye, be nabir anba nadmogar sogeye. Timoteo surye ega sogsasulid. Guaggwa gudigusad emar bendagnaega.
Timoteo, Pablobo Macedonia yargi neggwebur naidse nadmalad, Tesalónicase. Aa neggweburse owarmaggegala bule digga gannamasmala; sorba urgine nadmarbalid. Aa neggweburgine Jehová igargi buggidar dulemar odurdasmalad. Auggi abar dulemar isdar wemar daggarmalad, oiddobi guarmalanad. Aaga Pablo, Timoteobo bamalad neggweburmarse Bab igargi sunmagnadmarsunnad.
Timoteo yeer iddodii gusad
Niimar nanasad sorbali Pablo, Timoteoga soggalid, gannar be Tesálonicase gwenagan dagnaoye, bule nueganbimardibeye. Aa neggweburgi wemar oiddobi gusmalanad, auggi Timoteodi dobgussulid gannar aas naega. Timoteo aase nade gusad, ar bur gwenagan aagi bugmaladgi binsaenad. Gannar Pablos nonigua, sognoniggid, ¡Tesalónicagi gwenagan anba nued Jehovága arbadidiye!
Timoteo, Pablobo undar Jehovága arbadidii gusmalad. Ibagwengi Pablo garda narmasad, aagi sogsad, Timoteo gadi Jehová igar binarsoggua, geb gadi dulemar binarbarsoggua, sordagan bendaggega bur an aa barmidoye.
¿Be wile dulemar dagmoga? ¿Jehová igargi be dulemar odurdagbimoga?... ¡Degiile be nabir Timoteoyobi yeer idodii be gusmogaled!
