Bela anmar mani abegedbiid gwenaganga mas baggega, mor baggegardibe (Proverbios 30:8). Ar “mani niggued emar bendagmogad” (Eclesiastés 7:12). Inbaggwa mani igargi sunmaglealile urwed nobi guardaed, auggine mer aaba be abirginbo urwed amidii guo (Efesios 4:32). Mer binsao be abirgin yogsaar mani owegoye, bemar na daggoed, ibugi mani owelegoe.

BIBLIAGI SOGLENAID: “Ar bemar wargwen na neg maddusur waraggwagwad sobbiele, ¿idu sigsursi, iddogega, igi mani abelegoe, degine, mani unniddiba nigbardibe a neg oguegar?” (Lucas 14:28). Nue abeleged bemar na igar amimaladi, ibu ibmargi mani owelegoe (Amós 3:3). Bemar daggoed, ibu ibmar bur nue bagged abelege, geb igi mani nabir owelesbalile (Proverbios 31:16). Anba bemar nue mani nigsundibe soglesulid mani niggad bela bin imaggoye. Mer agneb mani gaedgi binsamalo, unnila bemar mani niggadbi ebudii gumalo (Proverbios 21:5; 22:7).

WEYOB BE NABIR IMAGGED:

• Bela ibmar nue abelemalad bagsad sorba wis bemarga mani obidsale, bemar na nue daggoed, mani obidsad igi imaglegoe

• Bemarga mani unnigussurdaele, igar amimalo daggega, ibu ibmardi baglegosursunna. Sunna bemar weyob imagged, restauranteg mas bagged anale, neggi mas imagged

BIBLIAGI SOGLENAID: “Unnila Babdummad asabinbisulid, dulemar asabin ibmar nued imagdii anmar gubibalid” (2 Corintios 8:21). Be abirginga nueggwa sogo, igi mani be gwissi, geb igi mani be owesdabali.

Mani dummad owegedgi be binsaalile bin be abirginbo sunmagdagolo (Proverbios 13:10). Bemar nueggwa we ibmargi sunmagdaele, bemar binsa urwed aminai guosulid. Be bennuglesale, mer binsao, we mani begadbiye, we mani be omegadmogad, mimmigangadmogad (1 Timoteo 5:8).

WEYOB BE NABIR IMAGGED:

• Be abirginbo igar amigo, igi mani bemar na wala walagwengi owegoe

• Mer mani sadde gued abiddogo geb mani igargi nueggwa sunmaggega