¿IBU ibmar gwabbid wegine sobarnai? Dulemar sobarnanai, massered geb ome, gebe obinyilesmaladi. Massered onugsalenoniggi Adán, geb ome dina, Eva. ¿Doa wemar obinyisadi? Babdummadi. ¿Be wisi Babdummad igi nuga? Jehováye nuga.

Babdummad Jehová weyob Adán obinyisa: nabba buru susa, geb wegine dulega san nued imasa. Geb sorbali we dule asu gine burwa buu imasa, geb Adán durgunonisunna.

Babdummad, Adán gala arbaed soggwen ugsa. Ega sogsa, ibmar durgan galagwensur niggadgala nuga amigoye. We imaggegala, Adán ibmar durgan daedi beedse dagdigusgweler gebed, nabir ibmar durganga nug nued amigegala. Aa ibmar imagdiid gine, Adán ibmar soggwen daggali. ¿Be wisi ibu daggali?

We ibmar durgan na ber ebogwad niggadbii. Elefantemar na omebo omebo geb leónmar na omebo omebo gudimala. Auggine, Adán dina, bogwad saddena. Degisoggu, Jehová imasa Adán belabela gabedi, geb e diggargar wargwen ei onosa. Jehová we diggargar gine Adánga ome imasa, we, e ome gala gunonisunna.

¡Emisgi Adán yeeriddonade! ¡Eva anba yeeriddosmogar gebed we neg yeerdaglegedgi gudigunonigu! Emisgi nabir mimmigan niggumala, geb na buraggwa yeeriddodii gudigumala.

Jehová abesana, Adán, Eva bogwa sadegua gudigumaladi. Abesbalina wemala yeerdagle Nabbaneg imaggedi, Edén neg yeerdaglegedyob. ¡Adán, Eva bogwa yeeriddosmalar gebed we arbaed imaggedgi binsasmargua! ¿Nabbaneg yeerdagleged imaggedgi be arbasmogan gadinye be binsae? Auggine, Adán geb Eva bogwa, suiddi yeeriddodii gudigussurmala. Anmar daggoena ibigala.