DULE dummadi be siggi dani be daggalile geb e nono be neguasbirse owarmaggele, ¿igi be binsasale? ¡We dule, yeer dunguye! Ar ebbenne Nabbaneggi dule dummagana gudigusmala. Biblia soge wemar e babgana, ángelmar nibneg ginmaladye. Ar ¿igi deyobi?

Ebinsao, ángel isgana Nia, aunni neggaganaid. Ar anba imagnabalinad Babdummad ángelmar isgumalaga. Ibamar nadabbid gine, we ángelmala abar Nia bali igar sasmala. Nibneggi Babdummad wemarga arbaed ugsadi indasmala. Na sanar imasmala geb Nabbanegse nonimala. ¿Be wisi ibigala?

Biblia gine soge, we ángelmala daggarmarye dule omegan yeerdaglemala geb ebo gudigubiguarmarye. Aa gala Nabbanegse nonimala geb dule omegan niggusmala. Ar Bibliadi soge we ibmar nued gussurye, ar Babdummad ángelmar nibneggi gudiguega imasanad.

Ángelmar e omeganbo burwigan niggudmargua, e mimmigana dule bamaladbo aggarmalana. Gebe unni dogdar aggar dule bamaladbo daglesurmalana. Dumgumai gudmala, yeer gangued niggumai gudmala geb dule dummaganga gunonimala.

We dulemar dummagana, dule isganag gusmala. Burwisur gumaladbali geb yeer gangued nigmaladbali sabsur dule bamalad imagdemala. Abedamala bela dulemala emar yobi ibmar isgana imagmarmogadi.

Aa unni Enoc dina bad burgwisa, auggine Nabbaneggi emisgi dule nued baid gudibalina. We duledi nugana Noé. Noé dina bela Babdummad e gala ibmar sogedbali imasdae.

Ibagwen gine Babdummad Noé gala sogsa, bela dule isganamar obergued ibagana owarmasye. Deginigwale Babdummadi Noé bendaggoe geb e gwenadganmala, degine, ibmar durgan buggidar bendagbaloe. Anmar daggoena igi imasa.