JOSÉ geg na boed bargagusa. Bela e maiganga soge, nomargwerye. Unnila e gwenadganbo gusgua, José bodsunna. E gwenadgan suriddomala, ar wissurmalad ibiga we dule boe. Geb José wemarga soggali: ‘An José. ¿An bab anba dula gudii?’.

E gwenadgan suriddomala, geg sunmagge guarmala. Dobguarmala. Auggine, José wemarga soge: ‘Wis dagmala’. Es armargua emarga sogdebali: ‘An bemar gwenadi, an José, Egipto neggweburse bemar an ugsa’.

José nuedgi emarga sunmagnai guali: ‘Mer nagi nasigmalo bemar an ugsamaladba. Ar bur Babdummad sogedba an barmilealid Egiptose, dulemar bendaggega. Faraón sogedba an dule dummadga gunoniggid bela we neggweburgi. Degsoggu, bemar gwae an babse namalo, geb bela we ibmar ega sogmalo. Geb ega sogmarbalo wes megdaye’.

Degine, José na gwenadgan bular gugginba gaded geb e gwenadgangi maadda nagusad, geb bela e gwenadgan wagar usad. Faraón iddoargua José e gwenadgan gudimarye, Joséga soggali: ‘Carretamar sedmalo, geb be bab sunamalo, geb e negyaginmalad wese dagmalaga. An emarga Egiptogi bur nabba nued uggoed’.

Geb deyobi imasmala. Wegi sobarnaidgi be daggena, José na e bab abindagnoniggid geb bela e bab negyaginmalad, Egiptose nonimargua.

Jacob negyaginmaladi issesurmalanad. Bela Egiptose nadmargua, 70 mergumalad, Jacob geb e masmala, degine, e waganse baggale. Uggine, anba e omeganmar eba nadmarmogad, geb sun e maiganga gudimarmogad, eba nadmarmogar gebed. Bela wemar Egiptogi gudii gudmalad. Bilenonimalad Israel dulemarye, ar Babdummad Jacobbi nug ogwasad, onuggunoniggi Israel. Israel mimmigan Babdummadga bur neggwebur nuedga gunoniggid bamalad neggweburba, igi sorbali anmar daggoe.