WEG sobar naidgi massergan gwigwissi be daggedi, dule bamalad arbaed dummad imaggega sananai. ¡Be daggena wargwendi dule arbanaid dubgi bibyonai! Arbananaidi Jacob e gwenadganad, wemar Israel dulemarye bilemala. Geb e oarbamaladdi Egipto dorgana. Israel dulemar Egipto dorgan e maiganga gunonimala. ¿Igi we ibmar gunonisunna?

Undar Jacob e gwenadgana, Egipto yargi nueganbi gudigusmala. José, bur nugnigga Egiptogi gudigusadi rey Faraón yarba, wemar aggwemai gusa. Geb José dina burgwenoniggi. Geb Faraón gwabbid Egiptogi reyga megnoniggid, we duledi Israel dulemar isdar dagged.

Degsoggu we Faraón isgana, Israel dulemar dule maiganga imagnoniggi. Geb massergan dule isganamar sabsur emar samalad, wemargi naggulegega imasa. Wemar Israel dulemar belabelad arbaedga imasmala Faraónga negmar sobmalaga. Auggine Israel dulemar agga mergude. Beedse gine Egipto dorgan Israel dulemar dobguarmala, abaggale doggus mergudmalale, degine, gangudmar balile.

¿Be wisi Faraón ibu imasa? Israel omeganga goe gamaladga sogsa: ‘Goe massi gwalulenoniggile, oburgwemalo’. Auggine we omegan dule nuegan damalanad, degsoggu goe massi gwalulenoniggile oburgwissur damala.

Degsoggu, Faraón bela e neggweburga we igar ugsasunna: ‘Bela Israel dulemar goe masmala, oburgwemalo. Unnila bunamalabi mer oburgwemalo’. ¿We igar isgana gussur be dagge? Anmar daggoena igi massi bibbi wargwen bendaglesa.