WEGI masmala warbo be daggedi na ebo diggasur aggarmalad, ¿insoa? ¿Be wisi wemar igi nugmala? Ibmar maggedgi arbaedi Esaúye nuga, geb massigwa oveja aggwedgi arbaeddi Jacobye nuga.

Esaú, Jacobbo na darbo gwalulesmala. Isaac, Rebeca bogwa we masmala e serganmalana. Isaacdi bur yeer Esaú dagdae ar san magged soggu, geb mas senonidabali e gwenadgan ogunnega. Auggine, Rebecadi Jacob bur binar iddomoga, ar we dina dule boo daedi, gadegadedaed suli.

Dador Abrahán anba aunni dula gudii, degsoggu, iddoger saele, Jacob yeeriddosdaer gebed e dador ega Jehová igarba sunmaggalir. Abrahán burgwenoniggi 175 años niggadgi; aunni, we masmala darbo gwalulesmaladdi, 15 años nigmalad gine.

Esaú 40 años niggadgi omegan warbo niggusa, omegan Canaán neggwebur ginmaladi. We ibmar gusadbali Isaac, Rebeca bogwa nue buggibiddosmala, ar we omegandi Jehová na e Babdummadga imassurmalad.

Degiidgi, ibagwengi ibmar soggwen gusadba Esaú e urba Jacob abin saeiddononiggi. Daggargua, ibamar owarmasa, Isaac na e massi bur dummadga ibmar nued nigguoye sogoed iba. Ar Esaú, Jacob e ia soggu, Esaú abiddoge ega soglegedi be ibmar nued nigguoye. Auggine, Esaúdi bad Jacobga sogsa gudiina, bega bur soglegoye be ibmar nued nigguoye. Degine, we masmala gwalulesgua, Babdummad sogsa gusbali Jacobga soglegoye be ibmar nued nigguoye. Deyob ibmar gunoniggi. Isaac, e massi Jacobga sogsa, be ibmar nued nigguoye.

Sorbali Esaú we ibmar gusad wisgunonigua, Jacob abin saeiddononiggi. Belabela saeiddoge, geb sogsa Jacob oburgoye. Rebeca we ibmar wisgunonigua, nue buggibbinsaali. Degsoggu, na e sui Isaacga soggali: ‘Jacob, Canaán gined ome niggunonimogale, anmar bur bule buggibiddodii guoe’.

Degsoggu, Isaac, e massi Jacobse godsa geb ega sogsa: ‘Mer Canaán gined ome nigguo. Bur be Haránse nao, be dador Betuel negse. Geb be gilor Labán e sisgwa wargwen be nigguo’.

Jacob, bela e bab sogedba imasa, degsoggua, diggasur nade, Haránse owarmaggega, e gwenadganse.