JACOB masmala be dagge, buggidar gusmala; 12 mergumala. Geb anba sisgan niggusbali. ¿Be wisi igi abar we mimmigan nug nanaena? Anmar abar durdaggoena.

Rubén, Simeón, Leví, geb Judá, Lea mimmigana. Raquel daggargua edi mimmigan gwen niggusuli, buggibiddoali. Agala, e mai Bilha nugadi Jacobga ugsa, geb Bilha masmala warbo niggunoniggi, Dan, Neftalí bogwa. Degiidgi, Lea e mai Zilpa nugadi, Jacobga ugsamoga, geb Zilpa masmala warbo niggusmoga, Gad, Aser bogwa. Sorba Lea gannar warbo masmala niggunonibali, Isacar, Zabulón bogwa.

Degiidgi, Raquel nabir massi wargwen niggunonimoga. Onugsasa José. Sorba anmar bur bule ibmar durdaggoe José siggi, ar wedi, dule nugniggadga gunoni soggua. We masmala 11 merguedi gwalulesmala, Jacob, Labán walig gudigua, Raquel e bab.

Jacob anba sisgan niggusbali, auggine, Biblia unnila wargwenbi e nug obare. Adi nugana Dina.

Emisgi ibamar owarmasa, Jacob, Labángi bangue soggali geb gannar Canaánse naega. Degisoggua, bela e negya ginmaladse godsa. Anba na ovejamar geb molimar buraggwa urbisbali geb diggasur nadmarsunna.

Jacob, geb e gwenadgan buraggwa Canaánse owarmasad sorba Raquel goe baid niggunonibali. We ibmala gusa ibagwengi neg baidsig nadabmargua. Raquel ibigwensur goe niggussuli, geb goe bagnai burgwenoniggi. Auggine, e goedi burgwissuli. Jacob onugsasa Benjamín.

Anmar mer iege Jacob mimmigan 12 mergued e nugmar, ar bela Israel neggwebur wemargi daniggid. Israelgi 12 mergu neggweburmar niggana. Neggwebur 10 mergu onugsalesa Jacob mimmigan 10 mergued e nug bali, geb neggwebur gwabodina, José mimmigan ebogwad nug bali. Bela we masmala gwalulesad sorbali, beedse anba Isaac gudigusa, geb yeeriddosar gebed buggidar wagan niggusadba. Auggine anmar daggoena igi gusa e wagwa wargwen, Dina nugadi.