JOSÉ unnila 17 años nigga Egipto neggweburse sesmargua. Webali ugdabmala dule Potifarye nugadga. Potifar dina Egipto reyga arbae, we rey Faraónye bilege.

José belabela arbadae e ibed Potifarga. Degsoggua, José nue dumgusgua, Potifar onugsasa bela ega neg daggega. Degidde, ¿ibigala José esgaryagi mellesisunna? Potifar e ome ulale.

José dumgudgua yeerdagle gunoniggi, geb Potifar e ome, e suiga imagbi guali. Auggine, Josédi wisi we ibmar nuedsuli, agala, we ibmar imagbisuli. Potifar e ome saeiddode. Degsoggua, e sui nonigu, ega gaggansasa geb ega sogde: ‘¡We José dule isgana, e omega an imagbi guali!’. Potifar na e ome soged bur iddosa, geb sae José daggali. Geb imasa esgaryagi José meddemalaga.

Esgarya dagsiidi, sanar gussuli dagnoniggi José dule nued dae. Degsoggua, onugsasa bela bamalad galesimalad daggega. Beedsegi, Faraón e nog dagged abin saeiddoali, geb anba e madu sobed abin saeiddodbali, geb wemar esgaryagi mellesmarmoga. Ibagwengi muddiggidba, we dulemar warwargwena gabgin negburgan dagsamalad auggi agguiddosmala. Oibosgu José emarga soge: ‘Bemar gabdasad anga sogmalana’. Degiidgi, José, Babdummad ganguedba emarga sogsa we gabdagged ibu obare.

Nog daggedga José sogde: ‘Iba baase be onolego, geb gannar Faraónga nog daggedga be arbaoed’. Degsoggu, José ega soge: ‘Be nosale angi be sunmaggo Faraónga, geb be an bendaggo an wegi nomogaga’. Auggine, madu sobed gardina, José soge: ‘Iba baase Faraón be duggar egwanoed’.

Iba baagi José sogsad yobi ibmar gunoniggi. Faraón madu sobed e duggar egwadsa. Geb nog daggeddina esgaryagi siid onolesad, geb gannar rey gala arbaded. ¡Auggine, Joségi bar binsassuli! Faraónga gwen José gine sunmassuli, degsoggua, José esgaryagi anba sige dagleali.