LOT e gwenadgan buraggwa Abrahán waliggi gudimalana Canaán neggweburgi. Ibagwengi Abrahán Lotga soggali: ‘Anmar ibmar durgan buggidar gus soggua wegi nabba galaggugusa. Anmar nagi bangumalar gebed. Be wesig nadele, andi baidsig namogoed’.

Lot nabba daggarsunna. Geb daggali nabba soggwen nued nai, dii nigga geb gagan nued nigbali e ibmar durganga. Jordán Yalana. Degsoggu, Lot, na bela e gwenadgan sesa, geb e ibmar durganmar we yarse. Geb neg sobsamala Sodoma neggweburgi.

Sodoma dulemar dega nue isgus bugmalad. Lot dina dule nued soggu nued iddosuli weyob dulemar damaladba. Babdummad anba we ibmar nued dagsurmoga. Geb Babdummad ángelmar warbo, Lot sega barmiarsunna, owisogega Sodoma neggwebur obelolesoggarye, geb Gomorra neggwebur anba obelolemogoye, ar e dulemar isgana damarye.

Geb ángelmar, Lotga soggarmala: ‘¡Gwaegi! ¡Be ome, be sede geb be sisgan warbogwad sedbalo geb be noe!’. Lot e gwenadgan bogwa binna gunanaina, aaga ángelmar argangi gadebin imasmarsunna, geb neggweburgi onosmala. Degiidgi, ángel wargwen soggali: ‘¡Abarmagmala na bemar san bendaggega! Mer yarganba addagmalo. Yarse abarmagmalo, mer bemar burgwega’.

Lot e sisgan bogwa sogedba imasmala geb Sodomagi nosmala. Bibbisaar gwisgugwisgu nadsurmala, geb yarganba addassurmarbali. Auggine, Lot omedi ega soglesadba imassuli. Sodomagi wis bannaba gusgu, gwisgusa geb yarganba addasa. Geb Lot ome, balu gwamaggaledga binyissunna. ¿Be dagsa bia gwissi?

We ibmar gusadgi ibmar nued soggwen anmar nabir durdagge: dulemar Babdummad sogedba daele, Babdummad nabir bendagge, auggi, dule Babdummad sogedba dasulirdi, adi burgoe.