MOISÉS gannar Egiptose nonigua, e ia Aarónga sunmagnoniggi ibmar dagledisulid gusadsig. Degine Moisés, Aarón bogwa Israel dulemarse we ibmar dagledisulid oyosmargua, Israel dulemar bar bengussurmala wemar Jehová bali gudiye.

Degiidgi Moisés, Aarón bogwa, Faraón dagnadmala. Geb Faraónga sogdabmala: ‘Jehová, Israel e Babdummadi soge: “An neggwebur be barmido iba baagwa wilub, yarmar uggubbii bibbirmagnaidgi anse gornamalaga”’. Auggine Faraón abinsogsa: ‘Aggu an Jehová dagge. Israel neggwebur an barmido suli’.

Faraón nue saeiddoge, ar neggwebur arbaed iba gae soggalid Jehováse gornamalaga. Degsoggu, bur bule arbamalaga imasa. Geb Israel dulemar soggarmala: ‘Moisés nuggi anmarga arbaed ogannolesa’, geb Moisés buggibbinsaarsunna. Auggine Jehová ega sogsa mer bai iddogoye. Jehová sogsa: ‘Faraón an neggwebur barmidega an imaggoe’.

Moisés, Aarónbo gannar Faraón dagnadmarbali. Emisgindi, ibmar dagledisulid soggwena imasmala. Aarón suwar ganiggidi nabbagi medde, geb we suwar nagbe dummadga binyisa. Auggine Faraón nergan suwarmar na meddemarmoga, geb nagbega gudmarmoga. Auggine ¡be dagge! Aarón e nagbe, Faraón e nergan nagbe domai. Deginigwale Faraón anba Israel dulemar barmibi gussulid.

Degsoggu iba owarmassunna Jehová, Faraón odurdagsoggali. ¿Be wisi ibu imasa? Imasa Egiptogi bonigan 10 agnied, negbeedsegid naguedi.

Bonigan agnimaid irba Faraón, Moisés sega godsa dae, geb ega sogsa dae: ‘Bonigan be bargae, geb Israel neggwebur an barmidoed’. Auggine boni galenoniggile, binsaed ogwasdabali. Neggwebur barmissurdae. Auggine boni sogambegid sorba, Faraón, Israel neggweburga sogsa be namarsunye.

Be wisi warwargwengi bonigan 10 agnisadi, ¿biddimarsunna? Garda be obinena, geb anmar daggoe biddimarsunna.