¿BE IDDODII asna sunmasye? Sun be soge: ‘Suli, ar ibmar durgan geg sunmagged’. Auggine Bibliadi soge asna sunmasye. Anmar daggoena igi we ibmar gusa.

Israel dulemar bad ogussaar buggwa Canaán neggweburgi dogega. Balac, Moabgi reyga maidi, Israel dulemar dobe. Agala dule wargwen ewisid emar binsaed gaed nig godsa, Balaam nugadi, Israel dulemar nig sogega, ibig geg ibmar isgana aamargi yole dibeye. Mani issesur an beg uggoye ega sogsa, degsoggu Balaam asnagi nade Balac daggega.

Auggine Jehová abesuli Balaam E neggwebur nig sogedi ibig geg ibmar isgana aamargi yoledibeye. Agala, ángel wargwen barmiali espada gani Balaam idu igargi gwisguega, mer naega. Ar Balaamdi ángel dagsuli, auggine e asnadi ángel dagged. Asna nobigunaina ángelgi, geb nabbis igargi megwissunna. Balaam nue saeiddoali, geb suwargi asna sarsoali.

Degiidgi Jehová imasa Balaam iddogedi e asna eg sunmagge. Asna ese egissali: ‘¿Ibig be an sarsoge, igi an be imasa?’.

Balaam asna gala soge: ‘Dule binsaed saddedyob be an imasa. ¡Espada an ganiggina, an be oburgoena!’.

Asna ese egissali: ‘¿Weyob iduar an be imasdae?’.

Balaam soge: ‘Suli’.

Degiidgi Jehová, Balaam ángel daggeg imasa, ángel espada gani gwissidi igargi. Ángel ega soge: ‘¿Ibigar be, be asna sarsosa? Be idu igar edugega an noniggi, ar be Israel dulemar nig sognaedsuli, ibig geg ibmar isgana bemargi yoledibeye. Be asna angi be obadsasulina, an be oburgwisana, auggine asnadi an oaggalogosulina’.

Balaam soge: ‘An nue nosa. An wissulinad be igargi gwissidi’. Ángel, Balaam gassuli geb Balaam, Balac dagnade. Anba Balaamdi alamagnai Israel dulemar nig sogedgi, ibig geg ibmar isgana wemargi yoledibeye, auggine Jehová imasa ilabaa sogedi Israel dulemar ibmar nuegan niggumaloye.