SUWARGI nagbe bibbirmaggarnaid, ¿sunsogedyob daglesursi? Auggine, sunsoged suli. Esnun sobaled. Ar nagbe bamaladdina, nabbag mamaidi adi dula nanaed. We nagbemar dulemargi warmasmala geb dulemar uelearmala. Jehová, Moisésga sogsa we nagbe esnungi sobaled suwargi be nasiggoye, dulemar nabir daggega geb mer burgwemalaga. ¿Be wisi ibigala dulemar nagbegi warmasmala?

Ar Israel dulemar Babdummadgi geb Moisésgi issaggwa sunmasmaladbali. Soggarmala: ‘¿Ibigala Egipto neggweburgi be anmar onosa we yarmar uggubbii bibbirmagnaid gine anmar burgwega? Wegine mas gunned sadde geb dii saddebali. Budar anmar maná gungusad’.

Auggine maná mas nuedi. Jehová ibmar dagledisulid imasgua we mas emarga ugsa. Anba emarga dii ugsabali ibmar dagledisulid imasbargua. Auggine we dulemar dina Babdummad e aggwemaid bai dagsurmala. Ar aagala Jehová nagbe gidsi niggamalad barmiali Israel dulemar odurdaggega. Nagbemala dulemargi warmasa geb buggidar dulemar burgwenoniggid.

Nabbis degiidgi dulemar Moisésga sognadmarsunna: ‘Anmar nosa, ar anmar Jehovági issaggwa sunmasmalad geb be gine anmar issaggwa sunmasmarbalid. Emisgi, be Jehováse gole nagbemar osulogega’.

Degiidgi Moisés emar anar Babdummadse godsa. Geb Jehová, Moisésga sogdesunna be esnun soboye nagbeyob dagle. Geb ega soge suwargi be nasiggoye, geb dulemar nagbegi warmasmaladi, we nagbe sobarnaidsig addagmaloye. Moisés, Babdummad ega ibmar sogsadba imasa. Geb nagbegi warmasmaladi esnun nagbeyob sobarnaidsig addadmala, geb gannar nugusmala.

We ibmar gusadgi anmar ibmar soggwen durdagge. Belagwable anmar Israel dulemar nagbegi warmasmaladyob gumarmoga. Be dagdesundibe bela dulemar seredguedbiid, uelemaladbiid geb burgwemaladbiid. Adán, Eva bogwa Jehovági agbadsamalad bali deyobid, ar bergwable anmar aa mimmiganbiid. Auggine Jehovádi igar soggwen anmarga amisa nabir anmar sadegu gudiguega.

Nabbanegse Jehová na e Massi Jesucristo barmiali. Auggine buggidar dulemar binsasmala we dule isganaye, aagala suwargi biogsamala. Auggine Jehová, Jesús barmiali anmar bendaggega. Anmar Jesús siggi addagdemosundibe, geb eba nanabarsundibe, nabir sadegu anmar gudigusale. Sorbali bur bule we igarsig anmar durdaggoe.