¿BE DAGSA weg ibmar gunaid? We dulemar urwemaladi Israel soldadomar. Dulludullu gunanai be daggedi, dii gobnanai. Juez Gedeón emar walig gwismoga. Emar daggwissi igi dii gobmala.

Nue be dagge, we dulemar galagwensur dagle dii gobnanaid. Abar dullu imasmala, wagar diise owarmaggedse. Wargwendi, argangi dii wesa geb gaggase dii sesa, daggega e diggarba igi neggunai. Wegi saele bur nuedi, ar Jehová, Gedeónga sogsad unnila miamia addagnai dii gobmaladbi be suoye. Bamaladdi gannar negse namaloye. Anmar daggoena ibigala.

Israel dulemarga gannar negbeedse guarbali, ar Jehová sogedba ibsassurmalad bali. Madián ginmaladdi bur Israel dulemar bali yeer gangumalana, aaga Israel ginmalad sabsur imaglesmalad. Degsoggu Israel dulemar Jehovág sogsamala, anmar bendagye, geb Jehová emar goled iddosa.

Jehová, Gedeónga soge soldadomar amigoye, urwemalaga. Degsoggu Gedeón urbisa 32.000 mergu soldadomar. Auggi Israel dulemar bogwa urwemaloeddi 135.000 mergumala. Deginigwale, Jehová Gedeónga soge: ‘Be doggus buggidar dulemar nigga’. ¿Ibigar ega deyob sogsa?

Ega deyob sogsa ibigala ar Israel dulemar naggwismalale, sun binsasmalaled na e ganguedba naggwismarye, geb gwen Jehová e bendagged abesurmarye naggwega. Agala Jehová, Gedeónga soge: ‘Bela dobe iddomaladga be sogo, gannar bemar na negse namaloye’. Gedeón deyob sogsagua, 22.000 mergu soldadomar gannar nadmala. Unnila 10.000 mergu dulemar melledmala urwemalaga, auggine 135.000 mergumaladbo urwemaloe.

Auggi, ¡be iddogena! Jehová soggalid: ‘Anba be doggus buggidar dulemar niggad’. Degsoggu imasa Gedeón dulemarga sogedi diangi dii gobmaloye, geb bela dulemar dullu dii gobsamalad, e wagar diise owarmaggedse, bela gannar e negse barmidoye. Jehová ega soge: ‘Unnila 300 mergu dulemar miamia dii gobsamalad urwedga be sedoe, geb unnila wemar buraggwagwa naggwedga an be imaggoe’.

Degiidgi urwed iba owarmassunna. Gedeón 300 mergu e urwemalad sogbaa buraggwa buraggwa urbisa. Geb gar warwargwen dulemarga ugsa ogolega, geb medde bibbigwa gwagwagwen ugsabali, aa yabardi gwallu sii. Neggabigwen gubinnedgi, e isdarmalad buggwadse nadmala geb bela ebirismala. Degiidgi, ber na darebi gar ogoddemarsunna geb medde mamarismar bali, geb binnasur goddemala: ‘¡Jehová espada geb Gedeón espada!’. E isdarmalad urwemalad addaarmargua na suriddomala geb gwaggiarmala. Bela waggiddemala, geb Israel dulemar naggwismala.