MOISÉS, Israel dulemarba Canaánse dogbie. Agala weyob soge: ‘Jehová, an Jordán diwar obagbie, nabba nued daggega’. Jehová dina weyob ega soge: ‘¡Gusa! ¡Mer bar we ibmar obaro!’. ¿Be wisi ibigala weyob Jehová ega sogsa?

Moisés aggwa sarsosgua ibmar gusad ulale. Ebinsao: Moisés, Aarón bogwa Jehová e nug odummossurmala. Neggweburga sogsasurmala Jehová dii aggwagi aryoedga imagmainye. Agala Jehová sogsa wemar Canaán neggweburgi dogosurye.

Degiidgi, Aarón burgwisad sorbali nii issesur nanassuli, geb Jehová Moisésga soggali: ‘Be Josué sue, geb be ogwisoe sacerdote Eleazar asabinni, geb neggwebur asabinni. Agine, bela dulemar asabinni, be sogoe Josué dummadga nug salesye’. Moisés bela Jehová ega ibmar sogsadbali imasa, weg sobarnaidgi oyolenaiyob.

Degiidgi Jehová Josuég soge: ‘Mer be siggirmaggo, geb mer be dobgubalo. Be Israel dulemar idugoe geb Canaán neggweburse Israel dulemar be sedoe igi an sogsa aa yobi, geb ani an be bendaggoe’.

Jehová sorba Moisésga soge, Moab neggweburgi, Nebo yardugguse naggoye. Wegine Moisés nabir daggoe Jordán diwar dagsiggi, Canaán neggwebur yeerdaglegedi. Jehová soge: ‘We neggwebur an uggoye sogsa Abrahán mimmiganga, Isaac mimmiganga geb Jacob mimmiganga. Daggedga an be imasa, auggine aagindi an be odogosuli’.

Wegine, Nebo yarbirgi, Moisés burgwisa. Aa unni 120 años niggana. Anba duddusulina geb anba bolebole addagsurbalina. Neggwebur wileiddosa geb belagwable wemar beedse Moisésga bodii gusmala. Auggine yeeriddosmala emisgi Josué e idugedga gunoniggidbali.