ISRAEL dulemarga negbeedse gualile, wemar Jehová sega godde damala. Jehová wemar iddomadae, geb wemar bendaggega idumalad bulegan barmiardae. Biblia we dulemar bie juezmarye. Josué gebe juezga megisadi, geb abar we sorba juezmar megismaladi: Otniel, Aod geb Samgar. Auggi dulemar Israel neggwebur bendasmaladi, warbogwa omeganana, nugmalana Débora geb Jael.

Débora Babdummad gaya burba berbegedi. Yoo ibmar guoed Jehová ega sogdae, geb degi Débora we ibmar Jehová sogdaedi dule bamaladga sogdamoga. Débora juez bali. Sabbursig ogob urbali sigwisdae geb dulemar ese nonidamala ega igar aburnaid nudaggega.

Aa ibagangi Jabín Canaán gine reyga mai. Carromar urwedgad 900 mergu nigga. Jabín sordagan yeer gangumar soggu, buggidar Israel dulemar Jabínga arbamaladga gusmala. Jabín urwemalad e dummadi nuga Sísara.

Ibagwengi Débora, juezse godsa, Baracye nugadi, geb ega soge: ‘Jehová sogsa: “Dulemar 10.000 mergu be sue geb Tabor yarse be sede. Geb Sísara an bes sedagoe. Geb an imaggoe be naggwedi Sísaragi, geb bela e sordagangi”’.

Barac, Déboraga soge: ‘Be anbo naerdi, an naodo’. Débora eba nade, auggi Barac gala soge: ‘We urwedgi naggwilegoed bali be nug odummolego suli, ar Jehová imaggoe ome wargwen Sísara oburgwega’. Geb weyob ibmar gunoniggi.

Barac, Tabor yar birgi gudii agdeali Sísara e sordagan abinguega. Uggiale Jehová neba naidi odosa geb buggib e isdarmaladi gundulesmarsunna. Sísara carro yagi sii agdesa geb waggidde.

Undar nanassuli, Sísara, Jael urmor neg owarmagdabbi. Jael ega soge be dogye, geb wis bibbi gobega leche ega ugsa. Gobsadba gabbiguali, geb sanar gussuli gabide. Degiidgi Jael suwar sussuigwad susa geb Sísara nono gine we suwar biogsa. ¡Sorba, Barac nonigua, Jael, Sísara bad burgwar mai ese oyosa! Débora ibmar sogsad gunoniggi.

Nabbis rey Jabín oburgwilenoniggi; degiidgi wis undarsaar Israel dulemar nuedgi gudigusmarsunna.