YEER we massi bibbi daglesursi, ¿nabiri? Samuelye nugad. Geb we dule, massi bibbi nonogi ebuebu sanaidi, Israel neggweburgi sacerdote e dummadid, Elíye nugad. Samuel e sergan, Elíse Samuel sesmalad; Elcanaye e bab nugad, geb e nandi Anaye nugad.

Samuel unnila birga bagge, birga addardibe niggad. Auggi Jehová tabernáculogi gudiguoed Elíbo, geb bamalad sacerdotemar bogwa. ¿Ibigar Elcana, Anabo Jehová tabernáculose Samuel sesmala, ar wed anba bibbi sursi? Anmar daggoena.

We ibmar gued iduale birgamar nasadgi, Ana nue wileiddodiinad. Geg goe nigguedba nue wileiddodiinad ar nue goe niggubimoganad. Degsoggu, ibagwengi Jehová tabernáculose nadgua, weyob Babdummad sega godsa: ‘¡Jehová mer be an iege! Be anga goe wargwen ugsasundibe, inniggigwadgi an beg soge an beg uggoe, bela e gudiguoedgi beg arbaedga guoe’.

Jehová, Ana ese ibmar egissadi abin imasa, nii nanasadgi Samuel gwalulenoniggi. Ana yaisur na mimmi binale, geb bibbigwad aggale odurdagdesunna Jehová igarmarsig. Degiidgi weyob e suiga soggali: ‘Samuel wis yagbasaar gusale, geb bar dogdar angi nai sulir, an sedoe tabernáculose, aagi Jehovága arbaega’.

Sobarnaidgi anmar dagge, Ana, Elcanabo e ibmar sogsadba imagnanaid. Ar e sergan nue Samuel odurdasmar soggua babigargi, we yeeriddomoga Jehováse goled neggi arbaoedba. Birga irba e sergan naddamala aa negse Babse golega, geb e massi daggega. Birga irba Ana, Samuelga morsaggwa sadded bini ega magsa sesdae.

Degi birgamar nadabbi, Samuel, Jehová tabernáculogi arbadii gude, geb Jehová nued Samuel dagge, neggwebur anba nued Samuel dagmoga. Elí e masmala Ofní, Finees bogwa, wemardi dule nuegan surmala. Ibmar isgana imagdamala geb anba imagdamar bali bamalad mer Jehovába ibsamalaga. Elí imagge wilubbuna wemar merbar sacerdotemarga guega, deginigwar deyob imassulid.

Auggi Samueldi imassuli, tabernáculogi ibmar isgana imaglegedi, Jehovága arbaedgi e obanega. Beedse gusa Jehová dulemarbo bar sunmagmasulid aggar, ar dulemar nabbiragwadgi Jehová sabmaladi aunni merba surmalanad. Samuel wis bibbi dungusadgi we ibmar gunoniggi:

Samuel tabernáculogi gabmaina, geb dule ese gole iddoargua addaggali. Geb sogde: ‘An be iddomai’. Degi gwisgussunna geb abarmagde Elíse, geb ega soge: ‘Be anse godsa soggua, an noniggi’.

Auggi Elí abinsoge: ‘An bes godsasuli; camas be gannar nae’. Degsoggu Samuel gannar camas nadsunna.

Degiidgi gannar ese gorlenonibali: ‘¡Samuel!’. Degsoggu Samuel gannar gwisguarbali geb gannar nadbali Elí maidse. Geb sogdabbi: ‘Be anse godsabar soggua, an noniggi’. Auggi Elí abinsoge: ‘An bes godsasuli. Gannar be megnae’. Degsoggu gannar Samuel megnadbali.

Ilabaa gude gannar ese gollearbali: ‘¡Samuel!’. Degsoggu Samuel Elíse abarmadbali. Elíga soge: ‘An noniggi; ar emisgindi be anse godsar gebed’. Emidi Elí bad magiddosa Jehová gormaidi. Samuelga soggali: ‘Gannar be megnabali, geb gannar gollarbarsundibe, weyob be sogoe: “Jehová, soge, ar beg arbaed be iddomaid”’.

Deyob Samuel sogsa Jehová gannar ese gollargua. Degiidgi Jehová Samuelga soggali, Elí odurdaglegoye geb anba e masmala odurdaglemarmogoye. Beedse gine, Ofní, Finees bogwa Filistea dorganbo urwenaidgi burgwismala geb Elí we ibmar gusad iddoargua, argwadsa, duggar bissisa geb degi burgwismoga. Degi Jehová ibmar sogsad gunoniggi.

Samuel dungusa, geb wee nabbi Israelgi juezga megisadi. Geb Samuel sered gusgua, neggwebur ega soggali: ‘Rey wargwen be sue anmar idugega’. Auggi Samuel we ibmar imagbisuli, ar Jehová emar reyga gued. Auggi Jehová, Samuelga soge, neggwebur soged be iddoye.