¿BE WISI we ibu nega? We Jehováse goled nega. We neg tabernáculoye bilebalid. Egiptog nosad sorbali, Israel neggwebur birgagwengi we neg sobed ogusmalad. ¿Be wisi doa soggali we neg soboye?

Jehová sogsa we neg soboye. Moisés Sinaí yarbirgi gudigua, Jehová ega sogsa igi soblegoe. Ega sogsa nabir ibigwensur ungeunge gue soboye. Degiile nabir neg baidsig ibgwensur selegoe, geb agine gannar sobegala. Degsoggu, Israel dulemar baidsig nae soggarmale na eba we neg sesdamala.

We negyabali be dagdele nabbi solaba cuarto bibbi siidgi, yabali ulugwa sii. We ulugwa nuga Bab igar mesisad ulu. Warbo or sobar buggwa ángelmar querubínye bilemaladyob dagle; wargwen, duggu soggwensig sindigar sii geb baiddina, baid duggusig sindigar sii. Babdummad gannar Igar Soganbegidi narmasbali aggwa maddargwagwad gwabowadgi, ar gebbegwaddina Moisés ber ogoamasad. We aggwamar maddargwagwadi sabolesa Bab igar mesisad ulu yaba. We ulu yabali maná anba nog gwagwen sabolesbali. ¿Be ebinsae maná ibua?

Jehová, Aarón onugsasa, Moisés ia, Israel sacerdote e dummadga guega. Degsoggu Aarón neggwebur iduarsunna Jehováse goledgi. E masmala anba sacerdotemarmoga.

Emisgi be we negyaba bur cuarto dummasaar siid dagge. Cuarto bibbigwad ilabogwa wilub dungued. ¿Be dagsa ulu bibbigi waa agnagsiidi? We aglagi sacerdotemala ibmar wawadig yabbanned inciensoye nugad ogummagmalad. Be dagbali gwallu dossiggwa dummad saggwa wargugle niggad, aagi gwallu gwagugle gabuggwa. Sogbaagwadgi ibmar we cuarto yaba siidi adi mese, we mese birgi gusgu 12 mergu madu magudae.

We negmagabardi, bormo dummad sibalid, dii enamaggar. Sacerdotemar we dii ebumala nag enuggega geb argan enuggega. Aa waligga agla dummad sobar sibalid. Aa gindi ibmar durgan iblolemaidi ogummagleged Jehovága uggega. We nega, negmar abargi sii, geb Israel dulemardi bela we neg ebiris na e urmor neggi mamamoga.