BURGWED iduar, David, Babdummad Jehová neg soblegoed garda Salomónga ugsa, Babdummad sega goled neg sobega. Birga baggegus negdagmaidgi Salomón we neg sobedi onode, geb birga gugle abargi we neg obelononiggi. Miliba dulemar alamasa we neg sobedgi. Ar or buggib ebules soggua we neg sobega, yeer mani gargegu milesa, geb mani sibu buggib ebulesbali.

Igi iduale tabernáculo cuarto gwabo bur birigined niggusa, ayobi we nega cuarto gwabo bur biriginedi nigmoga. Auggine we negdi e cuartomar ilabogwa wilub idualedba dungunane. Geb Salomón imasa, cuarto nabbi solaba siid yaba silegedi, Bab igar mesisad ulu; bamalad ibmar tabernáculo yaba buggwa gusaddi, cuarto baid yaba oubolesa.

We neg bela ogusgua, iba dummad onolesa. Salomón sindigar we neg asabin sigwisa geb Babse godsa, sobaledgi be dagge yobi. Salomón Jehová gala soge: ‘Be dule dummad gu soggua, bela nibneg bibbirmagnaidi be gardi yagbasulid, degisoggu, ¿igi we negdi bur be egi megosunna? Auggine, be an Babdummad guedi, be neggwebur we neg sig bese goddemalale, wis be emar iddoge’.

Salomón Babse goled ogusgua, nib soo agdenoniggi. Bela ibdurgan Jehovága uggega oburgwilesmalad agla birgi mamaidi gummasa. Degine, Jehová bela we negmee imagnoniggi. Weyob oyolesa Jehová iddomai, geb yeeriddoge we neg soblesadba, degine, Salomón ese godsadba. Emisgi we negse dulemar Babse golega nanae guarmala, tabernáculodi indaglesa.

Birga bali Salomón binsaed nigga negidumai gusa, geb dulemar yeeriddo buggwa gusa. Auggine, Salomón buggidar omegan neggwebur bamalad ginmalad niggusa, aamardi Jehová na e Babdummadga imagsurmala. Be daggena we ome wargwen, ibmar sobaled asabinni ibmar oyonaid. Nabbis we omegan imasa Salomón ibmar sobarmalad na e babdummadga imagmogadga. ¿Be wisi emisgi igi neggusa? Salomón dule isganag gude, geb neggwebur emisgi bar yeeriddo suli.

We ulale Jehová, Salomón abin isdariddoali, geb ega soge: ‘Be negdagmaidgi an be obanoe, geb dule baid an be anale mesoe. Be duladgi we ibmala an imaggosuli, be massi negdagmai gusale an we ibmar imaggoe. Auggine, be massigi bela dulemala an obanosuli’. Anmar daggoena igi we ibmar gusa..