FILISTEA dorgan gannar danimarbali Israel neggweburbo urwega. Emidi David iamar warbaa Saúl soldadomarba dogsamarmoga. Agala, ibagwengi Jesé, Davidga wegi soggali: ‘Be iamarga madu sede, geb bamalad ibmar gullemalad sedbalo. Geb nue daggo, igi gunamardibe’.

David, urwemalad neg buggwadse owarmagdabgua, abarmade na iamar amiega. Emisgindi dule dummad, Filistea ginedi, Goliat nugad noali, Israel dulemargi yam dodogega. Geb 40 días gude, wagdaradba, muddiggidba, we dule deyobi nononidae. Binnasur gornonidae: ‘Dule wargwen amimala anbo urwega. Ar we dule an gine obidsale, geb ese an oburgwilesale, adi anmar bemar maiga gumaloed. Auggi an we dulegi naggwisale, geb an we dule oburgwisardi, adi bemar anmar maiga gumaloed. Degsoggu, ar amimala dule wargwen anbo urwega’.

Geb, David egissali abar soldadomarse: ‘Dule wargwen we Fi­lis­tea dule oburgwisale geb Israel neggwebur bendasale, mer bar binge iddodii guega, ¿ibu ega uglegosunna?’.

Soldado wargwen ega soge: ‘Saúl ega buggidar ibmar mani sagla gumalad uggoe. Geb anba e sisgwa ugbaloe’.

Auggi bela Israel dulemar Goliat dobedbimala, ar we dule bibbisur soggua. We dule, dule wala bogwa wilub dungue, geb dule baid ega escudo yam sedidabalid.

Abar soldadomar Saúlga sognadmala, David Goliatbo urwenabiye sogye. Auggine Saúl, Davidga soge: ‘Geg be nae. Ar anba bedi massi bibbigwad, we duledi gusgu dule urwed daniguad’. David abinsoge: ‘An oso oburgwisa geb an león oburgwisbalid, an bab ib oveja sesmargu. Emisgi Filistea dule wemaryob gumogoed. Jehová, an bendaggoedid’. Degsoggu, Saúl ega sogdesunna: ‘Degirdi nae, geb biddiggi Jehová be bendasan gadina’.

Emisgi David diwarse agdenade geb aggwa burwigan swiri daglemalad gwaaddar susa geb na sagu sediid yaba ber odosa. Sorba gannar naggwidbarsunna, biombo bibbirmaggar mileged na semai, dule bibbisulidbo urwega. Degine, Goliatdi, David ebo urwe daniggidi geg dagge. Ibmar ibigwensuli oburgwelegedyob David dagge.

Goliat soge: ‘Be anse dage, ibmar durganga an be san uggoe, gunmalaga’. Auggi David abinsoge: ‘Bedi an bina espada sedaniggid, be lanza sedanibalid, auggi andi Jehová nuggi be abinni nadabbid. Emi ibag Jehová anga be uggoed, an be obelogoed’.

Emisgi David Goliatsig abarmade. Sagu sediidyab aggwa onosa, geb biombo bibbirmaggar mileged yabali aggwa sisa, geb belabelad ganguedgi Goliatgi aggwa medde. Geb, ¡aggwa Goliat nono yaba dogdabbi; agladgua, yog burgwaled! Filistea dorgan daggarmargua, e soldado bela emargi obinmaid amuggusa, bela waggiddemalad. Israel dulemar balimagdemalad geb weyobi Israel dulemar, Filistea dorgangi obidsamalad.