SAÚL gannar David gae soggarbali. Geb soldadomar 3.000 mergu amisad, soldadomar bur buleganad, David amiega. David we ibmar wisgusgua, negargamaladi barmisa, daggegala bia Saúl we muddiggi gabmadibeye. Degidgi, e sordagan warbo sega egidsa: ‘¿Doa an bogwa naoedi Saúl gabmaidse?’

Abisai soge: ‘Ani an naoe’. Abisai dina, Seruya massi, geb Seruya dina, David buna. Degiidgi Saúl geb e sordamarmala anba gabmamaidgi, David, Abisai bogwa arbaggee emar inbagine dogsamala. Geb Saúl nono nagabali e lanza maidi ei susmala, geb e dii gobed buglu ei susmarbali. Belagwable nue gabmama soggua, daglessurmala, dule ­wargwensaale iddossuli.

Emisgi be daggena, David, Abisai bogwa. Waggidsamala, geb yar birgi gwismala. Emisgi David binnasur godde Israel soldadomar e dummadse: ‘Abner, ¿ibiga be, nue be rey gala naggulessuli? ¡Daggena! ¿Bia e lanza nade, geb bia nade e dii gobed buglu?’.

Geb Saúl addaggali. Magiddoge David sunmagge, geb egissali: ‘¿Be David?’. ¿Be dagsa Saúl, Abner bogwa urbali gwismaladi?

David abinsoge: ‘Eye, dummad’. Geb David degi ese egisdesunna: ‘¿Ibiga an gaed bina be alamagdii? ¿Ibu ibmar issaggwa an imasa? Rey, an be lanza ganiggid be daggena. Lanza sued gala, dule wargwen dagdo’.

Saúl mag na nosad iddoge, geb soged: ‘An ibmar issaggwa imasa. An dule binsaed sulid yobi gusa’. Sorbali David nade, geb Saúl na negse nadmoga. Auggine, David na wargwengi soged: ‘Ibagwengi Saúlse an oburgweledabboed. An Filistea yarse wagginner geboed’. Geb deyobi imasa. David nabir Filistea dorgan yardasa, geb imasa wemala binsaega, emisgindi bar e isdaradsurye.

Beedsegi, Filistea dorgan Israelbo urwe soggarmala. We urwedgi Saúl, Jonatán bogwa burgwismala. David nue wileiddoge we ibmar gusadba, geb namagged soggwen yeer namagleged narmasa, aa gine wegi soged: ‘An nue wile be bali iddoge, gwenad Jonatán. ¡Ibiyob an be sabgudii gusa!’.

We ibmar sorba David gannar Israelse nade, Hebrón neggweburse. Wegine urwed nonai. Abar abemala Saúl massi Isbóset nugad, reyga megedi, geb baigandi David reyga imagbimala. Auggine, Davidba nanaidi un obinnonimala. David reyga megnonigua 30 años nigga. Hebrón neggweburgi negdagmai gusa, birga gugle abar. Abar e masmala agine ega gwalulesmalad nugnanae: Amnón, Absalón geb Adonías.

Beedse gine, David geb e sordagan Jerusalén, neggwebur yeerdaglegedi, sunae soggarmala. David buna Seruya nugadi, massi baid nigbalid, adi nuga Joab. We urwelenaidgi Joab emar iduged. Agala David, Joabga arbaed nued soggwen ugsa, onugsasa soldadomar e dummadga. Emisgi David, Jerusalén neggweburgi, reyga arbassunnad.