¿BE WISI ibigala we dule mor ogoamaggwissi? Jehová ega sogsa degi saoye. We dule nuga Ahías, Babdummad gaya burba berbegedi. ¿Be wisi ibu obare Babdummad gaya burba berbegedi? We dulemarga Babdummad iduaggwa sogsa dae, igi neggunoniggoe.

Wegine, Ahías, Jeroboánbo sunmaggwissi. Salomón, Jeroboán onugsasa abar e neg soblenanaid idugega. Igar bali Ahías, Jeroboán abinguargua, ibmar dargwen imasa. Mor binid birgi yoidi esusa, geb 12 mergu ogoamasa. Geb Jeroboánga soge: ‘10 mergu be na suo’. ¿Be wisi ibigala 10 mergu Jeroboánga ugsa?

Ahías soge Jehová, Salomón obanoye negidumaidgi. Soge Jehová neggwebur 10 mergu Jeroboánga uggoye. Degsoggu, Salomón massi Roboam nugadga, unnila neggwebur gwabo nabbi beoye, idumaguega.

Salomón iddoargua Ahías deyob Jeroboánga sogsa, saeiddoali. Salomón, Jeroboán oburgwed soggali, auggine Jeroboán Egiptose waggidde. Sorbali, Salomón burgwenoniggi. Reyga 40 años megisa, emisgi e massi Roboam reyga megnoniggi. Egiptogi mai Jeroboán iddoali Salomón burgwisye, degisoggu gannar Israelse noniggi.

Roboamdi rey isgana. E bab Salomón bali bur bule dulemar sabsur imagmai gusa. Jeroboán geb bamalad dulemar dummagan gudimalad bogwa, Roboam dagnadmala geb ega sogmala, wis neggweburbo nued daed abeleye. Auggine Roboam iddosuli. Agga bur bule isgude. Agala, neggweburmar 10 merguedi Jeroboán na e reyg imasmarsunna. Neggwebur gwabogwaddi, Benjamín Judá bogwadi, anba Roboam amar reyga mai gusa.

Jeroboán abesuli e dulemala Jerusaléngi, Jehovás goled neg siidse nanamaladi Babse golega. Agala warbo or sobsa becerroyob daglege, geb imasa neggweburmar 10 merguedi, we na e bab dummadga imagmalad. Sanar gussuli neggweburgi na sabsur imadmalad, geb ibmar isgana imaglegedi mergude.

Neggwebur gwabogwadgi anba negundar gunamoga. Anba Roboam yoo birga addar gue reyga maidgi, Egipto rey daniggi dagleali Jerusalénbo urwega. Egipto rey ormar buggidar Jehováse goled negyabali buggwad sesa. Degsoggu, igi gebe soblesgua sii gusa, Jehováse goled neg deyobi undar sii gussuli.