REI Jeroboán burgwisad sorba, Israel reino neggweburmar 10 mergu ganiggidgi reymar megismaladi, bergwable isganamarbii gusmala. Rey Acab, bur bule isgana gusadi. ¿Be wisi ibigala? E ome Jezabel ulale bur nue isgusbali, ar we ome, reina isgana gusad.

Jezabel Israel gined suli. Sidón rey sisgwa. Ibmar baid na e babdummadga imagdaena, Baal nugadse gole. Imasbali Acab, geb buggidar Israel dorgan Baalse gormarmogadi. Jezabel isdar Jehová dagge, geb buggidar Jehová gaya berbemalad oburgwisa. Bamaladdi aggwa ollormalad yabali duggusmala mer oburgwelemalaga. Jezabel ibmar soggwen abegele, emar oburgwedse imasdae, ibmar abeged nigguega.

Ibagwengi rey Acab wileiddoali. Degsoggu, Jezabel ese egissali: ‘¿Ibiga be wileiddoge?’.

Acab abinsoge: ‘Nabot anga ibmar sogsadbali. E nagnu uva digar naid an ese bagbiena. Auggi anga sogsa, geg an aa nagnu nigguye’.

Jezabel soge: ‘Mer buggibbinsao. An bega amigo’.

Degsoggu, Jezabel gardamar narmasa, dule dummagan Nabot neggweburgi gudimaladse. Weyob narmasa: ‘Massergan dule isgana gumalad sogega imagmalo, Nabot Babdummad nuggi issaggwa sunmagdiye, anba deyob rey nuggi sunmagdibarye. Degine, neggweburgi onomalo, geb oburgwega aggwagi magmalo’.

Jezabel wisguargua Nabot burgwisye, Acabga soggalid: ‘Emisgi be naena. E nagnu uva digar naid be na suo’. Jezabel weyobi sabed sadde ibmar imasadba, ¿odurdaglegedsur be binsae?

Agala Jehová beedsegi dule Jehú nugad barmiali, Jezabel ibmar isgana imasadba odurdaglegega. Jezabel iddoargua Jehú daniggi, ibya maged nasiderbinne geb na yeerdagle imagge soggali. Auggine Jehú nonigua geb ventanagi addagwissi daggargua, massergan rey neg yagi arbamaladga sogde: ‘¡Egwanmala!’. Sobarnaidgi be daggena, Jehú sogedba imagnanai. Egwadsamala, geb burgwenoniggi. Weyobi, Jezabel reina isgana bergunoniggi.