DULE dermaryagi gunaid be dagge. ¡Dule wiles! ¡Uas dolegoanda! ¿Be wisi we dule, doagi? We dule nuga Jonás. Anmar daggoena igi we dule weyobi guedse owarmasa.

Jonás, Jehová gaya berbegedi. Eliseo, Bab gaya berbeged burgwisad sorbali, isse saaledgi, Jehová Jonásga soggali: ‘Neggwebur yeer dunguedse be nao, Nínive neggweburse. E dulemar doggus isgus gubuggwa, geb aa igargi ega be sunmagged an be abege’.

Auggi, Jonás budar Nínive sega nae. Degsoggua, ur baidsig nadabbidbali nade. Jehová nued dagsuli Jonás wagginnedi. Degsoggu, diburwa dummad yamo onossunna. Yeer burwa gangu soggua, ur agbinbie. Ur selamala nue dobe iddomala, geb na e babdummaganse goddemala, bendagged egisega.

Nabbis Jonás we dulemarga soge: ‘Andi, Jehová an Babdummadi, nibneg geb Nabbaneg imasadi. Jehová anga ibmar sogsad imaggedgi an wagginmai’. Degsoggu, ur selamar ese egisdemarsunna: ‘¿Igi anmar be imaggosunna, diburwa bargaega?’.

Jonás emarga soge: ‘Dermar yagi be an meddemala, geb dermar bogi guoed’. Selamala budar Jonás meddemala, auggine diburwa bur gannaledgua, Jonás meddemarsunna dermar yagi. Geb diburwa yog bogilegar gusa, geb dermar gannar daarmagsi gusbali.

Jonás dermar yagi dogdegua, ua dummadse dolesa. Auggine burgwissuli. Iba baagwa, ibginedbali, geb muddiggidbali ua saban yaba mai gusa. Jonás buggibbinsae, ibiga Jehová sogedbali imassurdibeye, ibig Nínivese nadsurdibeye. ¿Be wisi, degsoggu ibu imassunna?

Jonás, Jehovás godsa geb ese bendagged egidsa. Degiidgi, Jehová imasa ua negdinnase agnaega. Sorbali Jonás, Nínivese nade. Jehová anmarga ibmar soggalile bela anmar eba ibsaedi ¿nue abelesur be dagge?