¿BE WISI ibiga we dule Jehovás gorsii? ¿Ibiga we gardamar Jehová agla asabin mesemese imasa? Nuga Ezequíasye. Israel reino gwabo neggwebur ganiggid rey. Emisgi negbeedsegid egi daniggi. ¿Ibigala?

We iduale Asiria dorgan, reino 10 mergu neggweburmar ganiggid bad obelosmala. Jehová wemar bendassuli, ar e dulemar isganamalanad. Emisgindi Asiria dorgan reino gwabo neggweburmar ganiggid bina sogdanimala.

Asiria e rey, gardamar rey Ezequías sega barmisa. We gardamar rey Ezequías, Babdummad agla asabinni mesemese imasa. We gardamar Jehovági dodoaggwa sunmagnai, geb Ezequíasga sognai, be siggirmagye. Agala, Ezequías Babdummadga weyob soge: ‘Jehová, be anmar bendagge Asiria e rey daniggidgi. Adi bela neggweburmar wisgumaloed, bebii unnila wargwenna Babdummadga guye’. ¿Jehová iddogo be binsae?

Ezequías rey nuedi. Israel reino 10 mergu neggweburmar ganiggidgi reymar isganamar megisad yobi dasuli, degine, anba e bab rey Acaz yobi dasurbali, rey isgana gusmogad. Ezequíasdi bela Jehová igarmar mamaidba nueggwa nanadii gusa. Agala Babse goled bergusgua, Jehová gaya berbeged Isaíasye nugadi, gagga barmisa ega sogegala, Jehová weyob sogye: ‘Asiria e rey Jerusaléngi dogosuli. E soldadomar wargwen saale egi waligga guosuli. Neggweburgi flecha soggwen saale miosurmala’.

Sobarnaidgi be daggena. We soldadomar burgwar mellemamaidi, ¿be wisi doamala? Asiria dorgana. Jehová na ángel barmisa, geb ibagwen abalaggwa muddiggidba, 185.000 mergu Asiria dorgan ese oburgwilesmala. Degsoggu, Asiria e rey na negse nadsunna.

Reino gwabo neggweburmar ganiggid bendaglesa, geb neggwebur negboogwad wis niggusa. Auggi Ezequías burgwisad sorbali, e massi Manasés reyga megnoniggi. We rey Manasés, geb sorba e massi Amón, reyga megismogadi, rey isganaganga gusmala. Agala neggwebur gine ibmar isgana imaglegedi mergudsunna, geb na sabsur imagmalad mergudbali. E maiganga gudimaladse rey Amón oburgwilesgua, sorbali e massi Josías reyga megnoniggi, reino gwabo neggweburmar ganiggidgi.