ISRAEL reino gwabo neggweburmar ganiggidgi, Josías reyga megnonigua unnila birga baabag nigga. Wegi birga niggale anba bibbigwa reyga megega. Agala, gebeun sergan neggwebur idugedgi Josías bendasmala.

Josías birga guglegus reyga negdagmaidgi, binsaali Jehová amigedgi. Rey nuegan megismalad igar bali nanasmoga, anmar sogoena: rey David, rey Josafat, geb rey Ezequías. Josías anba sabbingwa bibbi guedgi, dulemar dobsuli ibmar soggwen imasa.

Birga bali Israel dorgan, buggidar ibmar isgana imagmaladga gusmala. Ibmar baigan na e babdummadga imasdae. Nudsumar asabin dulludullu buggus damarbali. Degsoggu Josías geb e sordaganmala bela neggweburgi, noar babigar odurdagleged obeloarsunna. Wedi arbaed dummadid, ar buggidar dulemar ibmar baigan e babdummadga imagmalad. Sobaledgi be daggena, Josías geb e sordaganmala nudsumar ogoamagnanaid.

Sorbali, Josías dulemar warbaa onugsasa, Jehová sega goled neg siid nudaggega. Neggweburgi mani welesa, dulemar neg nudagmaloed bennuggega. Geb we dulemar neg nudagnanaid ibagi, Hilcías, Israel sacerdote e dummadga gudiidi, ibmar soggwen ibidar nued gued aminoniggi: garda soggwen egi igarmar narmaggarnaid, diggasurgus ebbennegi Jehová, Moisés narmaggega imasgusadi, degine, we gardadi yoggus gudiina.

We garda Josías sega sesmargua, Josías soge ega absomarye. Iddoargua, Josías daggali neggwebur gwen Jehová igarmar mamaidba nanabugsuli. Josías nue buggibbinsae, agala mor siir na imasa, igi sobaledgi be dagge. Soge: ‘Jehová isdar anmarbo iddoge, ar anmar sergandi we gardagi igarmar mamaidba nanassurmalad’.

Geb Hilcías, Israel sacerdote e dummadga gudiidga, Josías soge, amigoye igi Jehová anmar imaggedgi binsamadibeye. Degsoggu, Hilcías nadsunna bunagwa Babdummad gaya berbegedi Hulda nugadse, geb ese egisdabbi. Geb we bunagwa ega soge, Josíasga be sogoye, Jehová weyobi sogye: ‘Jerusalén geb bela e neggwebur, dummad odurdaglemaloe, ar ibmar baigan e babdummadga imagdamalad ulale, degine, ibmar isgana imaglegedi bela neggasa gunabali. Auggine, Josías, ar bedi ibmar nued imas soggua, be wagaba we dummad odurdagleged guosuli, ar be burgwisad sorba, geb we ibmar gunoniggoe’.