MILIBALI mergu dulemar Babiloniag nosmargua, bule digga nadmala, Jerusalénse. Auggine owarmagdabmargu, Jerusalén bela oes daglege. Dule wargwensaale egi gudisuli. Israel dorgan belagwable gannar sobmarbalir gebe.

Owarmagdabmargu, agla inso imasmala. We ailag, Jehovág ibdurgan iblolege. Sorbali, Israel dorgan Jehovás goled neg sobbarmala. Auggi, e isdarmalad, neggwebur nagabarmalad ginmaladi, Israel dorgan ogwaggiarmala e arbaed gaega. Nabbis, e isdarmalad imasmala rey gwabbid Persiag maid, igar soggwen mesega we arbaed galegega.

Emisgi birgamar nanasbali. Bad 17 años gude Israel dorgan Babiloniag nosad aggar. Jehová, e gagga berbemalad barmiali, Ageo geb Zacarías, dulemarga sogmalaga gannar arbamarbaloye. Dulemar bensurmala Babdummad e bendaggoedgi, geb sogedba imasmala. Degsoggu gannar arbaarmala, anba igar sogmai inigwale, mer bar arbamaloye.

Agala, dule dummad Persia gine gumogadi, Tattenay nugadi, daniggi dagleali geb egissali, doa sogedba Jehovás goled neg soblenaye. Israel dorgan ega soge Babiloniag gudimargua, rey Ciro emarga sogsaye: ‘Jerusalénse namalo, geb bemar Babdummad Jehovás goled neg sobnamalo’.

Tattenay emisgi garda barmisa Babiloniase, geb egissa, inso Ciro dula gudi unni deyobi sogsa sogeye. Sanar gussuli, rey gwabbid Persiag maidi garda barmiali. Soge eye, nabirye. Agala rey garda wegi narmassunna: ‘Israel dorgan e Babdummad goled neg sobnanaidi, mer ei gamalo. An bemarga soge, bemala wemar bendagmogoye’. Birga bagge gubinne Jehovás goled neg ogunoniggi, geb Israel dorgan yeeriddomala.

Emisgi birgamar yeer nanasa. Jehová sega goled neg ogusad aggale, 48 años gussaale. Dulemar Jerusalén ginmalad wilesaggwamala, degine, e neggwebur geb Babdummad sega goled nega yeerdaglesuli. Geb webali Babiloniag Israel dule wargwena, Esdras nugadi, wisgunoniggi Babdummad sega goled neg nudagleged abeleye. Agala, ¿be wisi ibu imasa?

Esdras, Artajerjes sega nade, Persia rey. We reydi nued dae, geb Esdrasga ibmar buggidar ugsa, Jerusalénse sedega. Degine, Esdras, bendaggedi egissa Israel dorgan Babiloniag gudimaladse, geb 6.000 mergusaale sogsamala, namarmogoye. Mani buggidar semamai, degine, olo geb ibmar bamalad yeer garge gumaladi.

Esdras wis oaggusaale, ar e igar namaloedba dule isganamar nig soggua. We dule isganamar sun ei mani addursamala geb ormar semamaid, degine, sun emar oburgwismarbalile. Agala Esdras bela dulemar buraggwa urbisa, igi sobaledgi be dagge. Geb Jehovás goddemarsunna, e bendagmalaga, ar diggasur namaloed Jerusalénse.

Jehová wemar bendasa. Geb nii warbagge gusadgi, Jerusalén owarmasmala. ¿We oyosur be binsae, dulemar Jehová bensurmaladi, Jehová nabir aamar bendagye?