WE OME yeerdaglegedi nuga María. Israel ginedi, geb Nazaret neggweburgi gudii. Babdummad wisi we ome dule nued gue. Agala e ángel Gabriel barmiali ebo sunmaggega. ¿Be wisi ibu ángel Gabriel Maríag soge? Anmar daggoena.

Ángel Gabriel ega soge: ‘Degidde, Babdummad beg nued binsaed. Jehová beb gudiguad’. María bibbisaale we dule iduar dagdisuli. María buggib binsaali, ar aggu iddoged we dule ibu eg obare. Auggi, Gabriel yog ega sunmaggale, mer buggib binsaega.

‘María, mer be dobe iddogo’, ega soge. ‘Jehová yeer nue beg binsaed. Agala ibmar ibidar nued gued beg imaggoe. Be goe massigwa nigguoe. Geb be onugsaoe, Jesús’.

Degine Gabriel ega sogdebali: ‘We massigwa dule nug niggad guoed, geb onugsalegoe Babdummad Bur Dummad gued e Massigwaye. Jehová we massigwa reyg imaggoe, igi David reyg gusmoga. ¡Auggine Jesúsdi reyg na sadegu mai guoe, geb e reino bibbisaale berguosuli!’.

Geb María soge: ‘¿Igi nabir we ibmar guosunna? Ande sui niggumasulid geb massered wargwenbo an gudisulid, ¿igi nabir an goe nigguosunna?’.

Geb ángel Gabriel abinsogde: ‘Babdummad gangued beg agdenoniggoed. Degisoggu, massigwa bilegoe Babdummad Massiye’. Degine ega sogdebali: ‘Be gwenad Elisabet, be ebinsae. Dulemar sogsa gusad we ome bad sered gusaddeye, sun bar goe baggo sogeye. Auggine, emisgi goe massi bagsoggali. Degsoggu, be daggena, ibmar soggwensaale Babdummad geg imaggedi sadded’.

Geb María sogdesunna: ‘¡Jehová e mai an gue! Igi an guoye soglesa, deyob an gusan gadina’. Degi, ángel nade.

Emisgi María gwaegwae Elisabetse nade. Elisabet iddosgua María es gole, e goe yeeriddogedba bilumasa. Geb Elisabetgi Bab gangued ubononiggi, geb Maríag soge: ‘Omegan baiganba Babdummadi beg bur nued binsasad’. María nii warbaagwa Elisabet walig gudigusa, geb sorba gannar Nazaretse nade.

Emisgi María sui niggued owarmasa, massered nuga José. Auggine, José wisguargua María goe bagsoggali, bur binsaali mer an nigguoye. Degine, Babdummad ángel ega soggali: ‘Mer dobguo; María sede, be na nigguo. Ar Babdummad sogedba we goe niggusoggalid’. Degsoggu María, Josébo na niggusmarsunna, geb emisgi abdagdii gusmarsunna Jesús gwaluleged.