MASSIGWA serganbo sunmaggwissidi, be dagge. We massergan, Jerusaléngi Babdummadse goled neg siidyag emar odurdagmaladi. Geb massigwadi, Jesús. Bad bibbisur gusa. Emisgi 12 años nigga.

Emar odurdagmaladi geger Jesús dagmala, ibiyob Babdummad siggi ibmar wisi, degine, Bibliag ibmar narmaggar naid nue wisbali. Auggine, ¿ibigala José, Maríabo dina daglesurmala? ¿Bia adi gudimala? Anmar daggoena.

Birga irbali José na gwenadgan sesdae Jerusalénse iba soggwen daggega, we iba Pascuaye bilege. Nazaret, Jerusaléngi yeer bangue. Aunni dule wargwensaar carro nigsuli, anba tren bela saddebali. Degsoggu, bur melu dulemar nagab nanadamala, geb Jerusalénse owarmaggeg, ibbaa wilubsaar imagdamala.

Aunni José bad buggidar mimmigan niggana. Degsoggu, Jesús urbamar geb e bunmar bur nue daggedgi e sergan binsadamala, ar aamala bur burwigwad soggua. Degiidgi, emidi José, Maríabo na mimmigan buraggwa gannar Nazaretse nadabmala. Binsamala, Jesús dulemar bamalad abargi nadabmoye. Auggine, negsedo gusgu, buggusmargua, gwen Jesús daglesuli. ¡Gwenagan bamalad abargi amismala geb ayamar abargi, auggine Jesús gwen daglesuli! Degsoggu, gannar Jerusalénse nae daglearmala, agine amimalaga.

Nabbis, un aminonimala. Daggargu, emar odurdagmaladbo sunmagsii geb we dulemarse ibmar egissii. Degine, bela dulemar geger dagmala, ibiyob we massigwa ibmar wisi. Auggine, María ega soge: ‘Massi, ¿ibig be weyob anmar imasa? An be babbo buggib binsagusmalad be amigedba’.

Jesús abin sogde: ‘¿Ibig bemar an bin miamagdimarsunna? ¿Ar bemar wissursi an Bab neggi an sioed?’.

Nabiri, Jesús yeeriddodae Babdummad siggi ibmar durdaglegedgi gusiile. Anmar deyobi gued abelemoga, ¿insoa? Webali Nazaretgi, Jesús iddoged irbali babigar iddogedse nanadae. Ar nueggwa iddosii gusda soggu, ibmar buggidar Bibliag narmaggar naid durdasa. Anmar Jesúsyob imagmogad nuedi.