JESÚS massi bibbi ganiggi siid, be dagge. Mimmigan nue binar daglege. Dulemar addagbugmaladdi, e apóstolmala. ¿Be wisi wemarga Jesús igi sogsii?

Daggargu, Jesús e apóstolmar bogwa emisgwa nonimala, bule digga gudimalana. Igarba danimargua apóstolmala na abinabin imasmala. Agala, nonimalad sorba Jesús wemarse egissali: ‘¿Igarba ibu ular bemar na abinabin imagdanimalana?’. Ar Jesúsdi wisina ibu ular na abinabin imagdanimalana. Auggine yam wemarse egissa, daggega bule apóstolmar eg sogmalodibe.

Apóstolmar gwen abin imagsurmala, ar daggargu igarba na abinabin imagdani gusmala, doa bur na emar abargi dummadga gudidibeye. Abar bamaladba bur dummadga gubimala. ¿Igi Jesús emarga sogoe, emarba bur dummadga gubiguedi, ib nued surye?

Jesús, massi bibbis godsa geb e sabbingan asabinni ogwissisa. Geb e sapinganga soge: ‘Bemar nue we ibmar wisgued an abeged: Bemar na daed ogwasurmalale geb burwiganyob gusurmalale, Babdummad reinog bibbisaale bemar dogosuli. Babdummad e reinog dule dummadga gueg we massi bibbiyob daer gebed’. ¿Be wisi ibigala deyob sogsa?

Ar burwigandi binsasurmala bamaladba bur dumma guedgi, deginbali, bur nug nigga guedgi binsasurmarbali. Degsoggu, apóstolmar we burwiganyob gued igar durdagmalar gebed, degine, bur mer urwemala dumma gubied ulale.

Emisgine niimar wis nanasbali. Jesús na oyononibali mimmigan binarba iddodae. Abar dulemar na mimmigan senonimala Jesús dagmalaga. Apóstolmardi, mimmigan abin obane soggarmala. Auggine Jesús wemarga soge: ‘Mimmigan anse dagmalag be imagmala, mer be abin obanmala, ar Babdummad e reino dulemar we mimmigan yobi damalad gadid’. Geb mimmigan gadebin imasa geb Babdummad sega wemar nuggine godsad. ¡Ibiyob nuedi anmar wisguedi, Jesús mimmigan nue sabe iddodaye! ¿insoa?