IBAGWEN gine Jesús dule wargwenga soge, dule bamalad sabgued abeleye. Geb we dule egissali: ‘¿Doa dule baidi, an sabguosunna?’ Jesúsdi wisi we dule igi binsagwissi. We dule binsae, unnila e dulemarbi geb eyob babse gormarmogadbi sabguoye. Anmar daggoena igi ega Jesús sogsa.

Emar odurdaggeg, inbaggwa Jesús, ibmar soggwengi emarga sunmasdae. Deyob emisgi emar odurdagde. Judío wargwengi sunmaded geb Samaria dule wargwengi. Anmar iduar bad durdasa, buggidar judíomar isdar Samaria dorgan dagdamala. Emisgi Jesús wegi soge:

Ibagwengi judío wargwen yar inbab daniggi, Jericó neggweburse nadabbi. Degiidgi addursamalad egi noali. Geb ei mani addursasmala, degine, sarsosmarbali geb burgwednaga meddemala.

Undargi, judío sacerdote, igarba danimoga. Daggali dule sarsolegar igarba melledii. ¿Ibu imas be binsae? Igar baidba nade, gwisgussuli. Degiidgi, dule baid babigar nue wismogadi danimoga. Adi levita. ¿Gwisgus be binsae? Suli, gwisgussurmoga we dule bendaggega. Be daggena edsaa agdemamaid, sacerdote, levita bogwa.

Auggi be daggena, doa sarsolesad walig sii. Wedi Samaria dule. Geb judío bendagsii. Sarsolegaled gine ega ina magnai. Sorbali negsoggwense sesbali, judío nabir obunnogega geb nuguega.

Ibmar gusad sogsiid ogusgua, dule es ibmar egissad sega Jesús egissali: ‘Emisgindina we dulemar warbaagwadi, ¿biddi bur dule sarsolesad sabgussunna? ¿Sacerdote, levita, Samaria duledibe, biddidi?’.

Massered soge: ‘Samaria dule. Ar wedi dule sarsolesad nue aggwisad’.

Jesús, abinsogde: ‘Inniggi be sogsa. Degisoggu, be namodo geb deyob dule bamalad be sabgumogodo’.

¿Bur nued be dagmoga, Jesús weyob emar odurdagged? Anmar nabir buggidar igarmar nuegan durdagge, Jesús ibmar odurdasad Bibliag naidgi, ¿insoa?