DUMMAD neggagalesad. Juan emar Bautizar saedi oburgwilesa. Herodías, rey ome, isdar we dule dagdae. Geb emisgi un igar amisa rey emarga sogega, Juan emar Bautizar saed nono sigmaloye.

Jesús we ibmar gusad wisguargua, wileiddoalid. Walagwen gudisaega yarmar uggubbi bibbirmagnaidse nade. Auggi dulemar eba nadmala. Jesús dulemar buggib e bali nade daggargu, wiledaggali. Degsoggu, emarga sunmaggali Babdummad reinogi, geb dulemar boni nigmalad nudasbali.

Negmuddig gudgua e sabbingan ese nonimala geb ega sogmala: ‘Bad wadsi diggasurgusad, degine, weg dulemar mamasurbalid. Be dulemar barmide, neggwebur iddaggaganse mas bagnamalaga’.

Jesús soge: ‘Emar nasulir aggarsulid, ar bemar emarga mas ugmaloedid’. Jesús Felipe siggi addade, egisded: ‘¿Bia anmar mas unniguar bagsale bela we dulemar ogunnega?’.

Felipe abinsogde: ‘Mani bibbisur oeleger gebed, mas unniguar baggega bela we dulemar wis isseisse iddomalaga’. Andrés sogdemogad: ‘We massigwa madu waladdar niggad geb ua uggabo nigbalid. Bela we dulemar ogunnega unnosulid’.

Jesús soge: ‘Dulemarga sogmalo, gagan birgi sigmaloye’. Geb Jesús Babdummadga dog nuedye sogsa mas nuggi, geb bisgebisge imaggali. Degiidgi e sabbingan, madu geb ua mimiarmala bela dulemarga. Masserganbi 5.000 mergu buggwa, geb omegan geb mimmigan anba miliba mergu bugmarmoga. Belagwable mas gudsamala immeregedse. ¡Geb e sabbingan mas obidsadi wearmargua, 12 mergu garba enosmala!

Emisgindi Jesús e sabbingan urgi barmisa, Galilea madda dummad obagmalaga. Muddiggidba diburwa dummad wemarga noali, geb dermar abin ur yollemaggali. Jesús sabbingan gwayearmala. Degiidgi, nue negmuddiggid bali, dule dermargi emarsig gannamagdani daggarmala. Dobedba binnasur goddemala, ar wissurmalad bali ibu daggarmala.

‘Mer dobgumala’, Jesús soge. ‘¡Ani an gudii!’. Anba iddosurmala. Degsoggu Pedro ega sogde: ‘Dummad, ar bee gudiile, be anga sogdo, dermar birgi be anse obagdaye’. Jesús abinsogsa: ‘¡Dage!’. ¡Geb Pedro agdesgua, dermar birgi gannaganna nade! Auggi egi dobed naguali geb dermar maddag dogde, degine Jesús bendasa.

We sorbali, Jesús gannar miliba mergu dulemar masgi ogudsabali. We undina, Jesús madu wargugle gine emar ogudsa geb ua burwigan issegwad gine. Geb gannar bela dulemar mas gudsabali. ¡Ibiyob geger daglege, Jesús we yobi dulemar aggwed bali! ¡E reinog, bar bibbisaar anmar buggib binsadii guosuli!