EMISGINE Jesús Olivomar yar birgi sii. Dulemar ebagge walig bugmaladi, e apóstolmala. Andrés, Pedro bogwa na gwenadgan gumala, geb Santiago, Juan bogwa na gwenadgan gumarmoga. Neg dummad banbaa nosiiddi, Babdummad sega goled nega, Jerusaléngi siidi.

Ibbo gusa Jesús Jerusaléngi asno birgi sii noniggid aggale. Emidina martes gine anmar nai. Dad abala, Jesús arbigwele Babse goled negse. Agine sacerdotemar Jesús gaed soggarmala, oburgwega. Auggi dulemar dobedba gassurmala, ar dulemar nued Jesús dagmalad.

Jesús, we sacerdotemar onugsasa ‘¡Nagbemar, geb nagbe mimmigan!’. Geb sogsabali, bela ibmar isgana imasmaladba, Babdummad wemar oiddogoye. Sorbali, Jesús Olivomar yarse nade, geb e apóstolmar ebaggegwa ese ibmar egissarmala. ¿Be wisi ibu egidsarmala?

Apóstolmar anba yoo ibmar guoedsig egissarmala. Emar wisi Jesús bela Nabbaneggi ibmar isgana gunaid obelogoe. Auggine wisgubimala san we ibmar guoe. ¿Sanawa Jesús gannar nonibaloe Reyg negdagmai guega?

Jesús wisi eb nanamalad Nabbaneggi e daggosurmala gannar daniggile. Ar edi nibneggi gudiguoe, degsoggu gwen daggosurmala. Agala, Jesús e apóstolmarga soge abar ibmarmar Nabbaneggi gudagoe, nibneggi reyg negdagmai gunoniggi sogele. We ibmarmar abar gunonimaloed, ¿biddimarsunna?

Jesús soge neggweburmar nabo urwed dummagan ononanai gumaloye, buggidar dulemar uelemai gumaloye geb uggumesdii gumarbaloye, ibmar isgana imaglegedi yaisur guoye geb negabandur dummagan nanamai gubaloye. Anba sogsabali bela Nabbaneg ugagse Babdummad reino e ibmar nuegangi sunmaglenai gubaloye. ¿We ibmala anmar iba gine gunai? ¡Eye! Degsoggu anmar bengued suli Jesús nibneggi emisgwag negdagmaye. Isse nabbi, bela Nabbaneggi ibmar isgana gunaidi obelogoe.