NUUGWA dule nono birgi agdemaid be dagge. We dule Jesús. Emisgindi 30 años nigga. Geb dule baiddi, nuga Juan. Bad anmar we dulesig wis ibmar durdasbali. María e gwenad Elisabetse addaggabgua, Elisabet e goe yeeriddogedba bilumasa, ¿be ebinsae? Juan we goe guena. Auggine, ¿ibu emisgi Juan imagnasunna Jesúsbo?

Jordán diwargi, Juan belagwable diayagine Jesús odosa. Weyobi bautizar imaglege. Dule diayagine bela odolegoe, geb sorba gannar onolegoe. Juan weyob dulemar imagdae, agala bidamala Juan emar Bautizar saed. Auggine, ¿ibigala Jesús bautizar imasa?

Juan we ibmar Jesúsga imasa, ibigala Jesús ega sognoniggi e bautizar saye. Juan bautizar imagge dulemar na oyobimalad buggib binsamarye ibmar isgana imagdii gusadba. Auggine, ¿Jesús ibmar soggwen imasmoga eba buggib binsaega? Suli, Jesús ibmar isgana imagdi suli, ar dule nibneggi daniggid soggu, geb Babdummad Massi gu soggua. Degsoggu, baid ibmar ulale Juanga sogsar gebe e bautizar imagye. Anmar daggoena ibu ibmar ulale.

Jesús, Juanse naed iduale, carpinterga arbaena. Carpinter urgomargi arbaed, mese sobe, ganmar sobe geb gan suigan sobbali. José, María sui, carpinter guena, geb José, Jesús odurdasa carpinterga gumogaga. Auggine, Jehová e Massi barmiarsuli Nabbanegse carpinterga arbaega. Arbaed bamaladyobsulid ega uggoed, geb emisgindi we arbaed iba owarmasa. Agala, oyogega e Bab ibmar abeged imaggega noniye, Jesús, Juanga sogsa e bautizar imagye. ¿Babdummad nued we ibmar dagsa be binsae?

Eye, nued dagsa, ar Jesús diayag noargua, nibneggi gagga burba gollali: ‘We an Massi, an eba yeeriddoge’. Anba nibneg ber argade yobi daglebali geb we nuugwa Jesús siggi agdeali. Auggine, we nuugwa sanaledsulid. Nuugwa sunnadyob dagleged. We Babdummad ganguedid.

Emisgi Jesús walagwen neg uggubbi bibbirmagnaidba 40 días nade, ibmar buggidargi binsaega. Geb aag gudii, Nia ese noniggi. Ilabaa Nia alamagnagusa, babigargi Jesús obanega. Auggine, Jesús ese binsaed galedsuli.

We sorba Jesús gannar noniggi geb dulemar gebbe e sabbinganga gunonimalad dagnoniggi. Abar weyob nugmalanad: Andrés, Pedro (anba bilebali Simón), Felipe geb Natanael (anba bilebali Bartolomeo). Jesús, e sordaganbo nadmala Galilea yarse. Aa mosmargua Canáse dogdabmala, Natanael e neggwebur. Agine dule wargwen ome niggunai, geb Jesús aa gine ibmar dagledisulid gebe imagnoniggi. ¿Be wisi ibua? Dii, vino gala obinyisa.