EMISGI jueves muddiggi. Jesús e apóstolmar 12 mergumaladbo we cuarto dummad agla nibali siidse nonimala, Pascua ibag mas gunnega. We dule nomai be daggedi, Judas Iscariote. Sacerdotemarse nadabbi, sogega igi nabir Jesús gasmalale.

We iba iduale, Judas sacerdotemarbo sunmasa geb egissa: ‘¿Ibu bemar anga ugmalosunna, Jesús gaedgi an bemar bendaggele?’. Geb ega sogsamala: ‘Mani sibu dulagwen gagga anbe’. Emisgi Judas wemar abingunade, Jesús sega wemar sedega. ¡Doggusdolle we ibmar imagnaid! ¿insoa?

Pascua ibag mas gunned bergusa. Auggine emisgi Jesús baid iba onogeg mas gunsoggarbali. E apóstolmarga madu ugsa geb sogsa: ‘Gunmala, ar we an san bemar ulale uglegoed obared’. Sorbali emar gala noggi vino ugsabali, geb sogsa: ‘Gobmala, ar wedi an abe obared, bemar ulale eyolegoed’. Biblia wegi mas gullesad onugsae ‘Cristo nabbi mas gudsad’.

Israel dorgan Pascua iba onodamala, ebinsaega igi Egiptog gudimargua, Bab e ángel emar neggi ‘nasgu’, emar aggar gussurmala. Auggi, aun Egipto dulemar mimmigan sagla ginmaladi, oburgwilesmala. Emidi Jesús abege e sordagan ebinsaedi, geb ebinsamarbalidi e, emar anar burgoedi. Agala emarga sogsa birga irbali weyob mas gundigumaloye.

Cristo Nabbi Mas gudsad sorba, na apóstolmarga soge mer dobgumalo, geb mer bibbisaar bengumaloye. Nabbidgi Babdummadga namasmala geb sorba nadmala. Emisgindi bad neggabgwen obidde gussaaler gebed. Anmar daggoena bia emidi nadmala..