ÁNGEL wagag egaar gani gwissid, be daggena. Jesús apóstolmar galebugmalad ononai. Anmar daggoena, ibiga gale bugmalana.

Bab burba nued Jesús sabbinganga ugsad, dogdar undar gussuli. Geb weyob ibmar gunoniggi: Pedro, Juanbo sedogidba Jerusalénse nadmala, Babse goled negse. Aa gine, wagag nagabali dule wargwen sii, we duledi gwalulesad aggale gusgu geg nanagua. Degine, banebane dulemar yamo sesdamala we negse, mani egisega dulemar Babse goled negse danidamaladse. Geb we dule Pedro, Juanbo daniggi daggargu, ese ibmar egidsali. ¿Ibu Pedro, Juanbo imagmalodibe?

Pedro, Juanbo gwisgusmala geb nuu we dule dagdemala. Geb Pedro soge: ‘Mani an sadde, auggi an ibmar niggad an bega uggoe. ¡Jesús nuggi, be gwisgue, be nanae!’. Geb Pedro we dule saggwa nuedsig gasgua, we dule idsomasa yog gwisguar, geb nanaali. Dulemar we ibmar gudi sulinad gusa daggargua, geg daggarmala geb yeeriddoarmarbali.

Geb Pedro emarga soge: ‘We ibmar dagledisulid anmar imasa, Bab ganguedba, ar Bab gannar Jesús odurgusadid’. Degi Pedro, Juanbo sunmaggwismaladgi, dulemar babigargi emar idumalad danimala. Wemardi isdariddodmala, ar Pedro, Juanbo dulemarga sogdimala, Jesús gannar durgusye. Degsoggu gasmala geb esgaryagi meddemala.

Oibosadgi, babigargi emar idumalad, igar iddoged dummad nigmala. Degine, Pedro, Juanbo selenonimala wemar asabin, geb anba dule nudaglesad selenonimogad. Geb babigargi emar idumalad egissarmala: ‘¿Ibu ganguedba bemar we ibmar imasmala?’.

Pedro soge Bab ganguedbarye, geb we Babdummad gannar Jesús odurgusye. Sacerdotemala suriddomala ibu imagmaloe, ar we ibmar gudisulinad gussurye geg sogmala. Degsoggu, urwedgi apóstolmarga sogmala mer bar Jesúsgi sunmagmaloye, geb sorba gannar onosmala.

Ibamar nanamai gusa, geb apóstolmardi Jesús nuggi sunmagdii gusmala, boni nigmalad nudagdii gusmarbali. We ibmar bela dulemar wisguarmala. Agala, Jerusalén nagaba neggwebur bugmalad e dulemar, buggidar daniggi daglearmala, dulemar boni nigmalad senonimala apóstolmar nudaggega. Degsoggu, babigargi emar idumaladi, nobedba apóstolmar gannar gasmarbali. Auggi ibmar soggwen emisgi gunoniggi.

Negmuddiggidba, Jehová ángel esgarya wagag eganoniggi, igi sobaledgi be dagge. Geb ángel soge: ‘Be namalo, degine, Babse goled negse gwisgudabmalo, emarga sunmagged mer bogigumalo’. Oibosgua, babigargi emar idumalad sogmala gannar Jesús apóstolmar sedamaloye, auggine amilessurmala. Sorba amidabmala Babse goled neggi, geb igar iddoged neg Sanedrín nugadse sesmala.

Degiidgi, babigargi emar idumalad wemarga soggarmala: ‘Anmar bemarga sogsa, mer bar Jesúsgi emar odurdagmaloye. Auggi bela Jerusalén gasa bemar gunaid bemar igar odurdaggedgi’. Apóstolmar abinsogdemala: ‘Ar Jehová anmarga negsemai soggua, bur abali anmar ibsaoed dulemarba ibsaed iduar’. Degsoggu, anba sunmagdii gusmala. ¡Ibiyobi igar nued anmarga mesismala!