JUAN, Pedro bogwa, Jesús burgwisgu mesismalad gine gudii nadmargu, María dina walagwen mellede. Geb boali. ¡Degiidgi, neguanyab addaggali geb ángel warbo daggali! Geb ángelmar, Maríag soggarmala: ‘¿Be ibig boe?’.

María abinsoge: ‘An Dummad sesmala, geb an wissuli bia imasmardibe’. Degiidgi, agbiridgu dule gwissi daggali. We dule ese egissali: ‘¿Be doa amie?’

Maríadi binsae we dule gagan emied dagleye, geb we dule sun Jesús sesar dagleye. Agala ega soge: ‘Ar be sesadile, be anga soge bia be mesisa’. Auggine we, Jesús. Emisgindi aggar daglege, aag María aggu dagsa. Auggine, nugbali ese gollargua adi María magdagge gunoniggi. Degsoggu María abarmade Jesús sabbinganse geb sogdabbi: ‘¡An Dummad, dagsa!’.

We ibmar gusad sorbali, Jesús sabbingan warbo nadabmala Emaus neg nugadse, geb dule wargwen eba agganoniggi. Jesús sabbingana wileiddonadabmala Jesús burgwisadba. Auggi we dule eba agganoniggidi, wemarga Biblia igarmar mamaidgi sunmaggali, geb basursaar wis iddogusmala. Nabbis, mas gunne soggarmargua, magdagge gunonimala we dule, Jesús. Degine Jesús yoggus nade, geb emardi Jerusalénse gannar nadmala Jesús apóstolmar owisomalaga.

Degi ibmar gunaidgi, Pedro, Jesús dagsamoga. Geb e sabbingan bamaladdi yeeriddoarmala we ibmar iddoarmargu. Degiidgi, Jesús sabbingan warbo Jerusalénse nadmala geb apóstolmar amidabmala. Geb sogdabmala igarba nadabmargua Jesús dagsamarye. Degi sunmaggwismalad gine, ¿be wisi ibu ibmar gunoniggi?

Sobarnaidgi be daggena. Wagag addusii Jesús dogsa. ¡Ibiyob Jesús sabbingan yeeriddodmala! ¡Nued we iba gusa! ¿Be emisgi nabir ebissale, irbigwa Jesús daglesa? ¿Iladdale?

Jesús dagsamargua, apóstol Tomásdi emar abargi gudisulina. Degsoggu, Jesús sabbingan Tomásga sogmala: ‘¡Anmar Dummad dagsa!’. Auggine Tomás dina soge, an sunnad an dagsulile, an iddogosuli. Degiidgi, iba baabag gudgua, Jesús sabbingana gannar cuarto yaba bugmarbali, anba wagag addusibali, geb emisgindi emar abargi Tomás gudimoga. Geb uggiagwale, Jesús emar abargi gwisgunonibali. Emisgindi Tomás emar iddossunna.