¡MANDUR, be dagge! ¿Igi neggunabali wegi? ¿Bule sabsur gusdibe massigwa nabbag mellediidi? ¡Be dagge, dule wargwen negyab nodaniggidi, Pablo gue! ¿Be dagsa Timoteo danimogadi? ¿We massigwa, ventanag sii argwadsasuli?

Eye, deyob gusa. Pablo, Jesús sabbinganga sunmaggwissina, Troasgi. Pablodi wisi bar muis emar daggosuli, ar bane sourba naoe. Degsoggu, sunmaggwissi gude neggabigwenadse.

Geb we massigwadi, Eutico nugad, ventanag sii gabide. ¡Agla darbaag sii argwadsa! Aa gala be dagge dulemala buggibbinsa daglebuggwa. Abga binsasmala, massigwa durguosurye. Dulemar massigwa onaggwiarmargua, ¡bad massigwa burgwale!

Pablo daggargua massigwa burgwisa, gadebin imasa. Degiidgi, Pablo soge: ‘Mer buggibbinsamalo. ¡Aggar gussuli!’. ¡Ar Pablo gannar we massigwa odulosa! ¡Weyob neggudisulinad! Belagwable dulemar yeeriddodmala.

Bela gannar naggwismarbali geb mas gunnarmarsunna. Degi Pablo sunmaggwissi gusa negibguedse. ¡Emidi bar Eutico gabosur an ebinsado! Degiidgi, Pablo, Timoteo geb bamalad eba gudimarmogadi uryag naggwismarsunna. ¿Be wisi bia wemala namarbali?

Wes Pablo irbaa gude babigargi sunmaggeg neggweburmarse addagdiid, emidi gannar negse nadabsunna. We addagged irbaagwadgi, Éfeso neggwebur ginbii birgabaa gudigusa. Degsoggu, emisgi bur undar bibbirmagdii gusa, iduale bibbirmagdii gusadba.

Troasgi nodmargua, Miletog sour wis nagunoniggi. Éfeso neggwebur iddagga nai soggua, Éfesog gwenadgan idudimaladse Pablo godsa, Miletos dagmalaga, ega nabbi sunmaggega. Sour nasoggargua, ¡nue wileiddomala Pablo nasoggar daggarmargua!

Nabbis, sour gannar Cesarea owarmasa. Wegine Pablo megnoniggi Felipe neggi, geb Babdummad gaya berbeged Agabo nugad, soggali Pablo Jerusalénse owarmas sogele esgaryag mellegoye. Geb nue deyob gusa, igi ar Agabo sogsa. Geb birgabogus Cesareag esgarya gine mellesiid sorbali, Pablo Romas barmilesa, agine Roma e dummad maid César nugad, sogega igi Pablo imaglegoe. Anmar daggoena igi gusdibe Romas nadabgua.