BE DAGGENA Pablo esgoro dubgi saggwag addinnar gwissid, Roma soldado egi naggulegwissid be dagbalina. Pablo galesii Romagi. Unnila abiddodii César, Roma gined sogedi, igi Pablo imaglegoe. Anba galesii inigwale, nabir ese addagmala.

Roma mosad sorbali ibbaagi, Pablo judíomar babigargi emar idumaladse godsa e dagdamaladga. Degsoggu, buggidar judíomar Roma ginmalad nonimala. Pablo wemarga sunmasa Jesús siggi geb Babdummad e reinosig. Abala eba nagusmala geb cristianomarga gunonimala, auggine bamaladdi iddosurmala.

Pablo anba babigargi sunmasbali, soldadomar baidbaid egi naggulenonidamalad gala. Pablo birgabo wegine galesii gusadgi, bela es nonidamaladga babigargi sunmasdae. Aa ulale, César negyaginmaladi anba Reino ibmar nuegansig iddosmarmoga, geb abar cristianog gunonimarmoga.

Geb, we dule mese asabin garda narmagsiid, ¿doasunna? ¿Be wisi doawa? Wedi Timoteo. Timoteo galesii gusmoga Reinog sunmagged ular, auggine emisgindi onoles gudii. Pablo bendaggeg noniggi. ¿Be wisi ibu narmagsii? Dagmaloena.

¿Be ebinsae neggweburmar nugadi Filipos geb Éfeso, Sunmagged 110 gine nanaidi? A gine Pablo bendasa buggidar dulemar urbedgi, Cristo sordagan gala guega. Emidi galesii, Pablo garda narmagge soggarsunna we gwenadganse. Gardamar, Efesios geb Filipenses nugmaladi, Bibliag nanai. Pablo emisgi Timoteog soggwissi igi garda narmaggoe cristianomar Filipos ginmaladse.

Filipos ginmalad Pablo esgaryag sigua, ega ibmar barmismala, geb agala Pablo gardag wemarga nuedye sogsiid. Epafrodito ega we ibmar seali. Auggine yeer uelema we duledi gusa, geb burgwed naga gusa. Emisgindi gannar nugusbali geb na gannar neggweburse naed mosbali. Pablo, Timoteo bogwa Epafrodito bali garda barmidmaloe, Epafrodito gannar Filipos nadele.

Esgaryag sii Pablo garda maddabo narmasbali, geb we gardamar Bibliag nanai. Maddagwena cristianomar Colosas neggwebur ginmalad gala. ¿Be wisi igi aa garda nuga? Colosenses. Baiddi e ai wargwenga narmasa, e ai nuga Filemón, Colosas ginedmoga. We garda sunmagnai Onésimogi, Filemón e maig gudigusadi.

Onésimo waggidsa gusa Filemóngi geb Romas noniggi. Degiidgi Onésimo wisguali Pablo aag esgaryag galesiiye. Geb Onésimo Pablos addaggabbi, degine, Pablo ega babigargi sunmasa. Geb Onésimo sanar gussuli cristianog gunonimoga. Emisgi Onésimo buggibbinsae waggidsadba. Agala, be wisi Pablo, Filemónga garda narmasgu, ¿ibu sogsa?

Pablo, Filemónga soge, Onésimo wis nosadi ega iessaye. Pablo ega soge: ‘Gannar an bes barmidoe. Auggi emisgindi, bar binsa be maig guegarbi suli. Emidi nue Cristob nagusmoga’. Onésimo gannar Colosasse nadgu, we gardamar sesa, soggwen gwenadgan Colosas ginmaladga geb baiddi Filemónga. ¡Ibiyob yeer Filemón iddosmodibe, wisgunonigu e maig gudiidi, eyob emidi cristianog gunonimoga!

Pablo garda narmasgua Filipos ginmaladse geb Filemónse, igar nuegan obarnai. Filipos ginmalad gala Pablo soge: ‘An bemarga Timoteo barmimai, auggi emissaale an bemarse nadabmogoe’. Geb Filemónse narmasa: ‘An idu, be neg nudaggo, an egi megega’.

Pablo galesiidgi nosgu, buggidar gwenadgan neg baidbaidsig bugmaladse addaggabbi. Auggi, sorba gannar Pablo esgaryag mellenonibali Romagi. Emidi wisi e iblomaloe. Degsoggu, Timoteos garda barmisa, ega sogsa gwae dagoye. ‘Andi Babga inniggigwadba arbasad’, gardag narmasa, ‘geb Bab anga ibnued uggoed’. Pablo burgwisad sorba, wis birgamar issesaar nanasadgi, Jerusalén gannar obelolenonibali, emidi Roma ginmalad egi ubononimala.

Auggi, Bibliag ibmar bamalad soglenabali. Jehová imasa, apóstol Juan nabbi gardamar narmaggedi, soggwen nuga Revelación. We gardadi sunmagge yoo neggunoniggoedgi. Anmar daggoena, igi yoogi neggunoniggodibe.