¡UR DOGDED be dagge! ¡Bela ayarmai! ¿Dulemar dermar yas idsomasmalad be dagge? Abar bad uggubbirse owarmagmamai. ¿Pablo gudimogina? Anmar daggoena, igi adi gudigusmoga.

Ebinsao, birgabo Pablo galesii gusa Cesareagi. Sorbali, Pablo geb bamalad dulemar galesimalad sourgi barmilesmala Romase. Cretadub waliggusmargua, diburwa dummad noali. Geg bar nue sour see guarmala. Ibgin Dad gwen daglesuli, geb muddig niisgwamar gwen daglesurmoga. Nabbis, ibagan degi nanamaidgi, bar bendagleged na iddosurmala.

Degiidgi, Pablo gwissi guali, geb soggali: ‘Bemar wargwensaale burgosuli; unnila urbi ayaroe. Ar muddiggi Jehová ángel anse arbi, geb anga sogsa: “¡Pablo, mer be dobguo! Ar César, Romag negdagmaid asabinni be gwisgudabboed. Geb Babdummad bela dulemar bebo nadabmalad bendaggoed”’.

¡Diburwa dummad noalid aggale 14 días gude, geb neggabgwen gudgua, selamar iddoali negdinna guali! Ar negsibbusur soggua, aggwadumma egwadsamala mer aggwadingi mellemalaga. Oibosgu negsuggun daggarmala. Geb sour uggubbirse sede soggarmala.

Degiidgi, uggubbir owarmagdanimargua, uggub dinnasaar naidgi sour mellenoniggi, geb agine galenonisunna. Degiidgi, dermar egi arwemai guarsunna, geb sour ayarisa. Emisgi, uryag idudiidi, soldado dummad gumogadi soggali: ‘Bela nabir dommumagmaladi, dommudommu uggubbirse obagmalo; bamaladdi sorbali issomagmalo, ur goagangi obagmalo’. Deyob imasmala, geb 276 mergu dulemar sourgi nadabmalad bela uggubbirse owarmasmala, igi ángel iduale sogsa.

Dubgan ese obagsamaladi, Malta nuga. E dulemar dule nuegan damala, geb urgi dulemar danigusmalad bendaggarmala. Neg wis nugusbargu, Pablo sour baidgi onaggwilesa, geb Romas selesa.