¿BE WISI e aimar buraggwa bunolo ibu absosii? Be garda absosiidi absobugmarmoga... An garda Bibliag sunmagged. Biddig be absosii, aa ginsunna absobugmarmoga... “Igi sadegu gudigulesale”.

¿Be wisi ibu ibmar durdagbugmala? Gebbegwad gine, sadegu gudisaega Jehovásig geb e Massi Jesús siggi durdaglegweler gebye. Biblia soge: ‘We igala sadegu gudisaedse anmar semai. Babdummad sunsoged wargwennagwad siggi be durdagge geb e Massi Jesucristo siggi’.

¿Igi anmar durdasale Babdummad Jehová siggi geb e Massi Jesús siggi? Soggwen gine, absogedi gebbe onoded obeloged sega, An garda Bibliag sunmagged. We garda nue Jehová gine sunmagnai geb Jesús gine, ¿insoa? Geb sunmagnabali Jehová, Jesús bogwa ibmar imasadgi geb ibmar imagmaloedgi. Auggine ibmar baid absolebalir gebed.

¿Be dagsa garda baid nabbag mabalid? Adina Biblia. Dule baid beg absogeg be imagge Bibliag sunmagged, Bibliag sulegar nanaidi. Biblia gine anmarga soglenai ibu ibmarmar abelege, nabbiragwadgi Jehovág arbaega, geb degi sadegu gudisaega. Aa gala anmar balibali Biblia durdagged abelege.

Auggi unnila Jehová geb Jesucristo siggi durdaggedbi unnisulid. Sun anmar we dulemarsig nue ibmar wisi gusale geb emar ibmar odurdagmamaid siggi, deginigwale sun anmar sadegu gudigussuliled. ¿Be wisi ibu ibmar nue abelebali?

Ibmar durdasad bali, anmar gudisabalir gebed. ¿Be Judas Iscariote ebinsae? Jesús 12 mergu apóstolmar susgua, sulesmogad. Judas nue Jehová siggi geb Jesús siggi ibmar wisina. Auggine, ¿igi gussunna? Ibamar nanasadgi na eginbi binsaali geb Jesúsgi agbidsa, mani sibu 30 binale. Judas sadegu gudiguosulid.

¿Guejazi be ebinsabali, Sunmagnaid 69 gine anmar aa dulesig ibmar durdasad? We dule dina mola geb mani e gad sulidi niggubigualid. Gaggansasad we ibmar nigguega, geb we dule Jehovás odurdaglesa. Anba Jehová anmar odurdagmogoed e igarmar mamaidba anmar dasulir.

Auggine buggib dule nuegan gudigusmarbalid Jehová bali nue nai na oyosmalad. Aa dulemaryob anmar gubimogad, ¿insoa? Massi bibbi Samuel igar nued anmarga oyosad. Be ebinsae, igi anmar Sunmagged 55 gine dagsa, we massigwa unnila birga bagge, birga addardibe niggua tabernáculo sega Jehovág arbaar gusad. Aa gala, anba be bibbi gusundibe, geg soglege be bibbi guye Babdummadga arbaega.

Nabiri, bela anmar Jesucristo yobi dabimoga. Sunmagged 87 gine oyonai, anba Jesucristo massi bibbi gue unni Babse goled neggi dule bamalad odurdagsii gusa e Bab nibneggined siggi. We gudigusadyob anmar damoga. Warbigwa dulemar anmar abinguodibe, bela aamarga anmar sunmagmogadi anmar Babdummad Jehová gine geb e Massi Jesucristogi. Bela anmar we ibmar imaggele, nabir anmar sadegu gudisaoe Babdummad gannar Nabbaneg yeerdagle imaggoed gine.