1. Bab Dummad, ¿igi nabbaneg imaggoye soge?

BAB Dummad soged nabbaneggi dulemar bonigan sadde yeer iddodii gudi gumaloye. Ar Bibliagine soglenaid ebbenne Bab Dummad Edéngi neg yeer dagle imasye, geb aagi sabbi nuegan urbisbarye. Sorbali Bab Dummad we neg yeer daglegedgi Adán, Evabogwa ogwisnoniggid, geb wemarga sogsad: “Bemar mimmigan buggidar niggumar. We nabneggi dula buggidar urbemar, degi, bela we nabneg ugaggaase anbiggumar” (Génesis 1:28; 2:8, 9, 15). Degsoggu anmar dagged, Bab Dummad abegena dulemar mimmigan buggidar niggumaladi, geb bela nabbaneg yeer dagle imagmarbalidi, geb ibmar durgan aggwedii gumarbalidi.

2. a) ¿Ibigala anmar bensuli Bab Dummad nabbaneggi ibmar imaggoye sogsadi gunoniggoe? b) Bibliagine igi soglenai, ¿dulemar igi damaladi sadegu gudi gumaloe?

² Igi be binsae, ¿ibagwengi Jehová sogsadyobi dulemar nabir neg yeer daglegedgi gudi gumalodibe? Bibliagine sognaid Bab Dummad sogye, “ede ibmar soged geg bar ogwaye [...] an imaggedseye [...] Bab Dummad geg gaggansaed” (Hebreos 6:17, 18; Isaías 55:11). Bibbisaar gaggansaosulid, soged Nabbaneg binsa nasissurye, dulemar egi anbagguega nasisye (Isaías 45:18). ¿Dulemar igi damaladi  Bab Dummad abegena Nabbaneggi gudi gumalad, geb birga bigwa gudi gumalad abebalina? Biblia weyob soged: “Dule[mar] nuegan damaladdi, Bab Dummad ega yar uggoye sogsadgi degi sadegu mai gumaloed” (Salmo 37:29; Apocalipsis 21:3, 4).

3. ¿Emi ibagine igi Nabbaneggi neg gunai, geb sun ibu ibmar anmar wisgubi gudagoe?

³ Auggi Bab Dummad ibmar imaggoye sogsadi anba yoo gued. Ar anba emi ibagindina dulemar uweleged geb burgwemarbalid, abar nabo uluddamarbalid, geb na oburgwiddamarbalid. Degsoggu Bab Dummad ibmar sogsadba anba ibmar gunasulid. Ar Jehová bibbisaar abessulid emi ibagine ibmar gunaidi guedi, ¿degid iggude? ¿Ibigala Bab Dummad ibmar sogsad gussuli? We ibmar anmar wisgubiele dulemar libromar onomaidgine anmar durdaggosulid, ar nibneggine neg gagaleded.

4, 5. a) ¿Doa nagbe ebusa Evabo sunmaggega? b) ¿Igi dule wissur ibmar addursaed, sun addursaedgala gusale?

⁴ Génesisgine anmarga soglenaid Edéngi Bab Dummad isdarad daglearye. We dule “nagbe[ye]” bile inigwale nagbe sunnad obarsulid. Geb Apocalipsisgine we dule bilenaid “nia sagla Satanás, dulemar bela nabneg naidgi yardagdiid dule[ye]”. Anba bilebalid “nagbe gebesaglad[ye]” (Génesis 3:1; Apocalipsis 12:9). Ar we ángel bela belad gangued niggad, dule burbaledid. Geb Evabogwa sunmaggega nagbe ebusad, dulemar yamo muñeca osunmagdamaladyobi imasad. Bab Dummad gebe dulemarga Nabbaneg imaggargua, we ángel bad gudimoganad (Job 38:4, 7, TNM).

⁵ Anmar wisid bela Jehová ibmar imaggedi nueganbiid, isgued sadde nanaed. Degiddega, ¿doa Nia obinyissunna? Bab Dummad ángel duggin na Niaga imasad. ¿Igi we ángelde deyob gunoniggi? Ar igi dule wissur ibmar addursaed  nabir ibmar addursaedga gusale, deyob gusmogad. ¿Igi deyob nabir gusdae? Ar sun dule ibmar isganagine binsadagoed, geb we ibmargi binsadi binsadi gudele, nabbis imaggebier gudagoed. Geb ibagwengi nabir we ibmargi binsadid imaglege daggardibe yog imaggaloed ar egi binsadiguad (Santiago 1:13-15 absogo).

6. ¿Igi Bab Dummad ángel Niagala gunoniggi?

⁶ Aayobi Nia gunonimogad. Jehová iddosad, Adánga geb Evaga sognagu, bemar mimmigan issesur niggumaloye Nabbaneg enogedse (Génesis 1:27, 28). We binsasar gebed: ¡Bela dulemar Babga arbaed anale, bur nabir anga arbasmalarye! We ibmargi binsadi gusadbali nabbis binna binna Evagala Bab Dummad ogaggansaded, wegii Eva yardagnoniggid (Génesis 3:1-5 absogo). Weyobi we ángel “Niagala” gunoniggid, dule emar ogaggansaedga, geb emar isdaradga.

7. a) ¿Ibigala Adán, Evabogwa burgwismala? b) ¿Ibigala bela dulemar seredguedbimala geb burgwedbimarbali?

⁷ Adán, Evabogwa mer Jehovábali igar samalaga Nia wemarga gaggansasad (Génesis 2:17; 3:6). Ar Jehová wemarga sogsanad, bemar anba igar sasurmalale burgwemaloye, deyob gunonisunnad (Génesis 3:17-19). Adán Babgi yolenonigua dule isganagala gussogua, bela e mimmigansega isgued ogwanonimogad (Romanos 5:12 absogo). Anmar mag iddogegala weyob anmar sogsaled: Dulce sobed bormo sarsolegalele egi dulce soblegoedi gullu gullu noda nanaoed, ar e bormo sarsolegaled. Aayobi Adán isgusgua anmarse isgued ogwasmogad. Aagala anmar ber seredguedbiid, geb anmar ber burgwedbibalid (Romanos 3:23).

8, 9. a) ¿Igi Nia, Bab Dummadga sogsayob iddollege? b) ¿Ibigala Bab Dummad abgayala egi agbidsamalad obelossuli?

⁸ Nia, Babgi Adán, Evabo obadsagua, Babgi agbinmalaga imasad. Jehovágala sogsayobid, neg wegi selesurye.  Degsoggua Nia sogsayob iddolleged, Bab Dummad wissur neg seye. Bab Dummad gaggansadaye, dulemarga ibmar nuegan ugmasurye. Sogsabalid dulemar Bab Dummad abesurye emar idugega, geb emarga sogedi ibu ibmar nuedi, geb ibu ibmar isganabali. Geb Nia sogsabalid dulemar ebali aggasmalale bur nued gudi gumaloye. ¿Bab Dummad igi Nia abin imasa? Abar dulemar sogdamalad, Bab Dummad  abgayala egi agbidsamalad oburgwisan bur nuedinye. Deyob imasana, ¿wisgulegoen be binsae Nia gaggansadiye? ¿Wisgulegoen be binsae, Bab Dummad bur nued neg seedye?

⁹ Jehová inniggi ibmar imagsoggua, aagala abgayala egi agbidsamalad oburgwissulid. Jehová iba nasisad mag daglegega Nia gaggansadiye. Degsoggua Bab Dummad dulemar gassulid mer Nia sogedba neg semalaga. Capítulo 11 gine anmar daggoed ibigala weyob Jehová ibmar imasa, geb ibigala abgayala neg onugussurbali. Nia bibbisaar Adán, Evabogwa bendagdisulinsoggua, ¿wemar eba igar sae wilubmalan be binsae? Bur Jehová wemar bendagmainsoggua, ¿binsae wilubmalandibe Jehová emargala gaggansamaye? ¿Beena ibu be imagmogoena?

10. ¿Igi nabir be Jehovábali aggasale, geb igi nabir be Nia ibmar sogsad abin imasmogale?

¹⁰ Párrafo 9 gine ibmar egislenanaidgi be binsamogar nuediled, ar emi ibagine anmar we ibmar abin imaggedsemogoed. Bedina nabir Jehovábali aggasaled Nia abin imagmogaga. Bedina nabir Bab Dummad be idugedga be imagged, geb weyobi mag daglegoed Nia gaggan duleye (Salmo 73:28; Proverbios 27:11 absogo). Millónba dulemar nigga inigwale, unnila issegwa dulemar Babba nagusdamalad. Aagala anmar wisgubied, ¿nue Bibliagine soglenadibe Nia we nabbaneg e dummadye?

11, 12. a) ¿Nia, Jesús binsaed ganagusgua, igi mag daglesa we nabbaneg semaidi? b) ¿Igi anmar nue wisi Nia nabbaneg e dummadi?

¹¹ Jesús bibbisaar binsassulid Nia we nabbaneg dummad surye. Ebbenne Nia, Jesúsgala bela neggweburmar nabbaneggi buggwad ese oyosad, geb weyob ega sogsad: “An nug odummogega, be sindigar an asabin sigele, geb we ibmar belagwabba an bega uggoed” (Mateo 4:8, 9; Lucas  4:5, 6). Be binsaena, neggweburmala Niagadsurnanaena, ¿nabir Jesús binsaed ganai guoen be binsae? Anba Jesús sogsasurmogad neggweburmar Niagadsurye degsoggua, mag daglege Bab Dummad e isdarad, Nia nabbaneg e dummadi.

¹² Bab Dummad bela ibmar obinyis inigwale, geb anba yeer gangued nigbar inigwale, Bibliagi soglenasulid we nabbaneg semadeye, anba soglenasurbalid Jesús we nabbaneg semamoye. Jesús sogsad, “nia sagla we nabneg dummadga gudiid[ye]” (Juan 12:31; 14:30; 16:11). Bibliagine soglenabalid, Nia “bab dummad we nabneggined[ye]” (2 Corintios 4:3, 4). Aagala, apóstol Juan sogsad, “bela dule[mar] we nabneg naidgi bugmaladi Nia sagla sogedba gudidimar[ye]” (1 Juan 5:19).

13. ¿Ibigala Nabbaneg nugued abelege?

¹³ Birgamar gwagmaidbali agga bur bule neg isgumaid. Nabbaneggi urwed yaisurgusad, dummagan neg idumamaidbela isgana gusmarmogad, Bab igargi sunmagmalad dummaganbela, binsasun unnila gordimarmogad anmar Babba naye, dulemar emar oburgwemalad yaisurgusbalid. Ibmar gunaidi dulemar bar nudaggosurmalad. Aagala Bibliagi soglenaid Bab Dummad bela neg isgunaid, Armagedóngi urwed noalir obelogoye. Geb aa sorbali Nabbaneg neg nuedga gunoniggoed.

14. ¿Bab Dummad doa onugsasa e gobierno Reygala guega, geb igi iduaggwa soglesa weyob guoye?

¹⁴ Jehová, Jesús onugsasad e gobiernogi reygala nibneggi megega. Iduaggwa Bibliagine weyob soglesad: “Ar susugwa gwensag anmarga gwalulesad, mimmi gwensag anmarga uglesad. A massi gandiggidba neg seoed, [...] Neg Bogidiggid E Dummadye, nugguoed. E gangued bela nasguoed, e neg bogidig seoed bela nasguoed, gwen berguosulid”  (Isaías 9:6, 7). Jesús emarga sogsad, bemar Babse gollarmalale we gobiernodina mer iemaloye. Weyob sogsad: “Be neg dagmaid [“be reino”, TNM] anmarse be sedage. Igi nibneggi be sogedba be ibmar imagge, deyob, we nabneggi be imagdamo” (Mateo 6:10). Sorba anmar durdaggoed igi Bab Dummad Reino, neggweburmar idumamaid bela obelogoe, geb aa anale e gobierno sinoniggoe (Daniel 2:44 absogo). Geb sorbali bergwable Nabbaneg yeer dagle imaggoed.

15. ¿Ibu obare “nabneg binid”?

¹⁵ Bibliagi soglenaid: “Ar anmardi, Bab Dummad anmarga nabneg binid, degi, nibneg binid uggoye sogsad edarbebugmarsunnad. Ar aagi, unnila igar iniggimaladbi gumai guoed” (2 Pedro 3:13; Isaías 65:17). Bibliagine “nabneg[ye]” soglenaile dulemar egi buggwad obardaed. Degsoggua “nabneg binid[ye]” soglegedi dulemar nuegangi sunmagnaid, Bab Dummad we dulemar nued daggoed.

16. Bab Dummad dulemar nueganga, ¿ibu ibmar nued uggoe, geb anmar we ibmar niggubiele ibu imagger gebe?

¹⁶ Jesús sogsa, Bab Dummad sogsaye, Nabbaneg neg binidga gunoniggile dulemar nue ebali nanamalad sadegu gudi gumaloye. Bibliagine wis be amige Hebreos 11:6 geb 1 Timoteo 2:4, aagine soglenaid, ibu be imagger gebye Jesús sogsa, be sadegua gudi guega. Emidina anmar durdaggoena, ibu ibmar nuegan Bab Dummad imaggoe dulemar neg yeer daglegedgi sadegu gudi gumaloedga.

17, 18. ¿Ibigala bibbisaar anmar bensuli yoogidsega bar dobgulegosuli?

¹⁷ Ibmar isgana, urwed, igar mamaidba dasurmalad, na sabsur imagmalad, bela we ibmar berguoed. “Isganamar nabbi idse gudidimalad. [...] Ar dule[mar] san dummarba imagsurmalad neg nued bonisulid egadga guoed” (Salmo 37:10, 11). Bar urwed nigguosulid, ar Bab Dummad  “we nabneg ugaggaase bela bila onoleged obelo[goed]” (Salmo 46:9; Isaías 2:4). Deyob neg gunoniggile “igar inniggigwad[bii]” imagledoed, ibmar nuegan “nasgumai guoed, nii naid berguedse ibmarmar nasgumai guoed”, degsoggu ibmar nuegan imagleged bar berguosulid (Salmo 72:7).

¹⁸ Jehovágala arbamalad dobgubuggwa guosurmalad. Bibliagine soglenaid, ebbenne Israel dulemala Bab Dummadba ibmar imasmaladbali dobgudi gussurmarye (Levítico 25:18, 19). ¡Ibiyob nued iddollege, ar neg yeer daglegedgine bibbisaar bar anmar dobe iddodii guosulid! (Isaías 32:18 absogo; Miqueas 4:4.)

19. ¿Ibigala anmar nue wisi Bab Dummad imaggoe neg nuedgine mas obinegwadgine nigguedi?

¹⁹ Ibmar gulleged obinegwadgine nigguoed. Salmogine sognaid: “Bela nabbamargi, ibmar gwag gullemalad buggidar niggu[oye]. Bela yalamar birgi, Líbano yargi ibmar gwag gullemalad niggayobi niggu[oye]” (Salmo 72:16). Dulemar nue ebali nanamaladgala, Jehová ibmar nuegan uggoed, “nabneggi bela ibmar durba sanmaggoed” (Salmo 67:6).

20. ¿Ibigala anmar bensuli bela neg dirbimaggar neg yeer daglegedga gunoniggoe?

²⁰ Bela neg dirbimaggar neg yeer dagle guoed. Dulemar neg oisgusadgine, neg nuegana soblegoed, duddumar yeer daglemaladi naguoed (Isaías 65:21-24 absogo; Apocalipsis 11:18). Bela neg dirbimaggar binna binna neg yeer daglegedgala gunoniggoed, ebbenne Edéngi neg yeer dagle nagusayobi guoed. Bab Dummad sadegua dulemarga ibmar nuegan ugmai gudoed (Salmo 145:16).

21. ¿Igi anmar wisi dulemar ibmar durganbogwa bar na aggar imaggosurmala?

²¹ Ibmar durgan dulemarbogwa bar na aggar imaggosurmalad. Ibmar durgan sabburbarmaladi, ibmar durgan neg yagginmaladbogwa buraggwa masmadidii gumaloe.  Burwiganmoga, bar bibbisaar ibmar durgan emar nagbi samalad dobgudi guosurmalad (Isaías 11:6-9 absogo; 65:25).

22. ¿Bonigan igi guoe?

²² Bonigan berguoed. Jesús, Bab Dummad reinogine reygala sigosoggua bela bonigan osulogoed, igi ebbenne nabbaneggi ibmar imagdii gusa, aabali bur bule imaggoed (Mateo 9:35; Marcos 1:40-42; Juan 5:5-9). “Bibbisaale dule gwensag sogosulid: an uweleye” (Isaías 33:24; 35:5, 6).

23. ¿Dulemar durguder ibigala anmar yeer iddogoe?

²³ Anmar gwenadgan burgwismaladi gannar durgunonimaloed, geb sun bar burgwissurmalaled. Dulemar burgwismaladi gannar durgunonimaloed, Bab Dummad wemar ebinsaer. Nabiri “dule[mar] nuegan burgwismaladi, dule[mar] isganamar burgwismaladi, gannar wemarga durgued ibagan noniggo[ed]” (Gusmalad 24:15).

24. Dulemar Jehovága arbamalale yoogidse ¿igi gudi gumaloe?

²⁴ Dulemar nabbi Jehová igar durdagbimaladi, geb ega arbabimarbalidi yoowedsega ibmar nued niggumaloed. Anba nue abelebalid anmar Jesús ibmar imagdi gusad durdagbalid, ar Jesús nuggine anmarga ibmar nuegan gunoniggoed.