BIBLIAGI anmarga sognasulid ibu ibagine nue Jesús gwalulesa. Auggi anmar wisid diciembregindi gwaluledsulid, ¿ibigala?

Jesús gwalulesadgine Belén neggweburgi, diciembregine ¿neg igiinsunna? Judíomar calendariogi kislev (noviembre/diciembre) niigine, gadi dii widaed geb neg diobbi dabalid. Geb sorbali tebet (diciembre/enero) nii nagunonidaed aa niigindi bela belad bur neg diobbi guddaed geb yarmargine bela belad boo baddesi dabalid. Anmar daggoena Bibliagi igi we ibmarsig sognamoga.

Esdrasgine sognamogad kislev niigine neg diobbi daye geb dii widabarye. Aagine sognaid, kislev (noviembre/diciembre) nii gine, buggidar dulemar Jerusaléngine wawanmagbuggusye dii dummad winai gusadba. Sogbalid dulemar aagine buggwa gusadi sogsamarye, we niigine yeer dii wiye, degsoggu geg neg magaba bugguleye (Esdras 10:9, 13; Jeremías 36:22). Degsoggu diciembre owarmasale sibad aggwemaladi na sibadmar sesdamalad negse negse mer neg magaba dambemesbuggwa guega.

 Auggi Bibliagindi sognaid, Jesús gwalulesgu muddiggi sibad edarbemalad sabburba neg magabali na sibad edarbebugmarye. Lucas, wegi narmasad: “A ibagi Belén neggwebur diggarba, sibad wawaad edarbemalad, e sibad wawaad muddig edarbebuggwa gusmalad” (Lucas 2:8-12). Be daggena wegine sognasulid unnila binsa ibgin sabburba gudidiinye, sognaid, muddiggi sibad edarbebuggwa gusmarye. Muddiggidbali neg magaba sibad aggwebuggwa gusmalad. Ar diciembregine neg diobbidasoggua geb gadi dii widabarsoggu, be binsaena, ¿nabir sibad aggwedde e sibad aggwesii neg magaba guoen be binsae? Geg gue. We ibmar soglenaidbali mag anmar iddoged Jesús diciembregine gwalulessuli. *

Bibliagine nueggwa soglenaid ibu ibagine Jesús burgwisa auggi e gwalulesad ibagindina dogdar sunmagnasulid. Soglenasursoggu nue ingu Jesús gwalulesa, rey Salomón ibmar sogsadgi anmar obinsasundo, weyob sogsad: “Ina wawadiggidba nug nued nigguleged, bur nuedid. Gwaluleged ibaba burgwed iba, bur nuedid” (Eclesiastés 7:1). Mag iddolledo ibigala Bibliagi bur bule sunmaglege Jesús ibmar imagdii gusadgi, geb e burgwisad ibagi; e gwalulesad ibagindina dogdar sunmagnasulid.