Nabbaneg yeer dagle guoed
Bela Nia ibmar oissosadi, Jehova onuguoed. Jehova, Jesus susad Reyga megega, nabbaneg idumai guega. Jesus, nabbaneg idudele bela nabbaneg yeer dagle guoed (Daniel 7:13, 14; Lucas 23:43).
Wegine soglenaid ibu ibmarmar Jehova imaggoye sogmai.
-
MAS OBINEGWADGI GUOED: “Nabneggi bela ibmar durba sanmaggoed, Bab Dummad, anmar Bab Dummad, anmargi nued binsaoed”. “Bela nabbamargi, ibmar gwag gullemalad buggidar niggusun. Bela yalamar birgi, Libano yargi ibmar gwag gullemalad niggayobi niggusun” (Salmo 67:6; 72:16).
-
GUERRAMAR BERGUOED: “¡Dagmala! Bab Jehova e ibmar imagsad be dagdamala. We nabneggi ibmar dagledisulid imagsad be dagdamala. Bab Dummad we nabneg ugaggaase bela bila onoleged obelosad” (Salmo 46:8, 9).
-
DULEMAR ISGANAGAN BERGUOED: “Ar dule isganamar burgwemaloed. [...] Dule isganamar nabbi issee gudidimalad. Ar a dulemardi be amidigumaloen inigwele, gwen be amiosurmalad” (Salmo 37:9, 10).
-
BONIGAN BERGUOED, NUNMAGGED BERGUOED, BURGWED BERGUBALOED: “Geb degine, dulemar aggu addagmalad magar addagdemaloed, dule uaya yallirmalad magar dule iddoge gumaloed. Geb deginbali, dule muya muyamalad, goe sabburyob issomagge gumaloed. Dule geg sunmagmalad, weligwaledba binnasuli goddemaloed” (Isaías 35:5, 6).
“Bab Dummad we dulemarga bela ibyanis elioed. We dulemar bar burgosurmalad. Bab Dummad, boed ega obelobaloed, buggib iddoged ega obelobaloed. Deginbali, we dulemar nunmagged bar iddogosurmarbalid, ar ade, bela ibmar iduarmalad bergusad” (Burbar-Oyolesad 21:4).
Jehovadi Satanasyobsulid, niamaryobsulid, Jehovadi wissur gaggansaed. Bela ibmar imaggoye sogmaidi imaggedsegoed (Lucas 1:36, 37). Jehova, be sabed, geb abebalid yoo neg yeer dagle imadele be aagi gudi gued. Degsoggu be nabbi Bab igar sunsoged nuegan Bab gardagi nanaid durdaggega, Jehovagi sunmagmalad amigo. Be, Bab igar sunsoged maidba igar imadele, bar be yardagledii guosulid, bar be ised dobgudii guosurbalid, geb be mag neg iddodbaloed. Yoogidse bar be ibmar isgana imaggosulid, geb bar be burgosurbalid. Nabir Jesus sogsad: “Bemar igar nabbiragwad wisgunonimalo[ye], degine, igar nabbiragwad isguedgi bemar ollorsanoniggo[ye]” (Juan 8:32).
