Dauda soged: “An, Sierra Leona neggweburgine dungualid. An ebinsaed ibagwengine, an bibbigwaunni an gwenagan, dulemar bamaladbo nabba binale urwenanai gusmalad. An gwenagan sogsamalad nabba anmargadye, bamalad sogsamarmogad nabba anmargadiddeye. Igar onuguegala ina duledse gollesad. Ina duledi, dule wargwenga isbe ugsad, geb mor sibugine we dule emurusad. Geb dule emurar gwissidi wawanmaggalid, geb wigmagdebalid. Isbe nuu dagdegua binnasur godded, sogded: ‘¡Dador, mor siibbu yoi dani an dagged! Masdadagwad, nono siibbubalid, durre nanabalid’.

”¡An iddogua, an dad obare! Gwaggidedbali binnasur godded: ‘¡Bemar, an iddosulile, bemar sunnad isbegi dagdamardo!’. Auggi, ¡dule wargwensaale ese warmassulid! Ina duledi, noggi ina sediidi dulegi mie mie imasad dule obogisaega.

”Dule, isbe gani gwissidi soged, ‘an dad’ eg sogye: We nabba an mimmigangadye. Degsoggu an muuga sogsad egi ibmar digoye, mer dobguoye. Bamalad soggarmarsunnad, degir nabirsunye. Igar aburnaid weyob nugusad”.

 Africagine belasaar dulemar weyob ibmar imagdamalad. Deyobi anba bamalad neggwebursiggi millonba mergu dulemar binsamarmogad, dule burgwisale serganga gusdaye, sulirdina, niamarga binyisdaye. Degsoggu dulemar dagdidimarye bendaggegardibe, dulemargi agbinegardibe. ¿Bule nue nabirdibe? Dule burgisale ¿nue gudidadibe? Degisulile, ¿doamar burgwismaladyobi na imagdidamarsunna? We ibmar nueggwa wisgued abeleged. Ar be wisgusulile sun be burgwed amiged, sulirdina be bendaglegodibe.