Jehova anmarga Biblia ugsad, Biblia yabali 66 mergu gardamar nanaid. Auggi, sun be wisgubi guarbaliled: “¿Bia Biblia daniggi? ¿Doa nue Biblia e ibedi?”. We ibmar wisguega dagmaloena, igi nabir Bab gaya burba anmar ibase owarmasmoga.

1. Dulemar Biblia narmasaddega, ¿ibigala soglebarsunna Bab gaya burbaye?

40 mergu dulemar Biblia narmaggedgi arbasmalad. 3.500 años gussaaled gebbe Biblia narmagleded aggar. 1.900 años gussaaled bela Biblia narmaglesad aggar. Degsoggu, 1.600 añossaar galesad nabir bela Biblia narmaglegega. Dule wargwenna Biblia narmaggedgi arbassur inigwale, auggi, Bibliagi nue igar nigga ibmar soglenanaid. ¿Igi nabir deyob imaglessunna? Ar Bab Dummad sogedba narmaglesad (1 Tesalonicenses 2:13 absogo). Dulemar na e binsaedba ibmar narmassurmalad. We dulemar, “Bab Dummad burba isligwaled sogedba sunmagsa gusmalad” (2 Pedro 1:21). a Degsoggu, Bab Dummad ganguedba dulemar nabir Bab Dummad binsaed narmasmalad (2 Timoteo 3:16).

2. ¿Doamar nabir Biblia durdasale?

Bab Dummad sogsad, bela dulemar ‘yar baid baidgi bugmaladi, dulemar ablis galagwenmaladi, dulemar gaya aggar aggar sunmagmaladi’ nabir Biblia durdagmaloye (Apocalipsis 14:6 absogo). Aagala, Bab Dummad imagmaid, Biblia nabir buggidar bamalad gayamarba ogwalemogaga. Emi ibagi Biblia bur bule bamalad gardamarbali, gaya baid baidba ogwalemaid. Aagala emi ibagine, bia dule masundibe, ibu gaya dule sunmagsundibe, nabir na e gayaba Biblia durdagged.

3. ¿Ibigala nabir Biblia obelolessurgusa?

Gebbe Biblia narmaglesgua, ibmar ibigwensur isgumaladgi narmaglesanad, ibmar durgan uggamargine, geb ibmar nagwargiid papiroye nugadgi. Aaunni, abar dulemar gadi Biblia binarmaladi, Bibliagi ibmar soglenaid nueggwa ibmar baidse ogwasdamalad, Bibliagi ibmar soglenaid mer yogguega. Deun dummaganga megwismaladdi Biblia obeloged soggarmalanad. Auggi aaunni, abar dulemar bela beladse alamasmarmogad, mer bibbisaar Biblia obelolegega. Jehova imassulid dule wargwensaale, ibmar soggwensaardibe, e gaya burba obelogega, ¿ibigala? Nabir anmar e gaya burba durdagmogaga. Ar Bibliagi soglenaid: “Anmar Bab Dummad gaya burbadi, degi sadegu mai guad, berguosulid” (Isaías 40:8).

 NUEGGWA WE IBMAR DURDAGMARGOLO

5. Biblia obeloleged naga gusad

 6. Biblia bela dulemarga imaglesad

Bamalad gardamarbali, Biblia bur bule bamalad gayamarba ogwalemaid. Gusmalad 10:34, 35 absomalo, we ibmargi sunmagmarbalo:

• ¿Ibigala Bab Dummad abege, Biblia buggidar bamalad gayamarba ogwaleged, geb baid baidsig mimilebalid?

• ¿Ibigala Bibliadi libromar bamaladbo aggarye be sogsale?

 WE IGARGI SUNMAGLESAD

Biblia Bab Dummad gaya burbad, degsoggu, Bab Dummad na imagmaid bela dulemar nabir Biblia niggumalaga.

Ibu be durdasa

• Dulemar Biblia narmasa inigwale, ¿ibigala be soge Biblia nue Bab Dummad gardaye?

• ¿Dulemar igi Biblia imagbi gusmalana? ¿Bule mergu Biblia bamalad gayamarba ogwalemai? ¿Bule mergu mimilemabali?

• Bab Dummad alamasad nabir e garda bes owarmagmogaga, ¿bule Bab Dummad be binar be iddosunna?