Jesus sogsad, dule e sordaga gubiele bautizar sagweler gebye (Mateo 28:​19, 20 absogo). Bautizar saedye sogleged, ¿ibu obarsunna? Dule bautizar sabiele, ¿ibu imaggweler gebe?

1. Bautizar saedye sogleged, ¿ibu obare?

Griego gayaba bautizar saedye soglegedi, dii yaggi ibmar “oddos saed” obared. Jesus, Jordan diwargi bautizar imasgua, dii yaggine oddos imaglesmogad, aaga Bibliagi soglenaid, ‘diwargi naggwiarye’ (Marcos 1:9, 10). Degsoggu, Cristo sordagan sunsogmalad bautizar imaggalile, dii yaggi bela oddos imaglesdamarmogad.

2. Dule bautizar imagnaile, ¿igi bad Jehovaga sogsa mag daglegoe?

Dule bautizar imagnaile, mag dagleged bad Jehovaga sogsa, an begarbi arbamogoye. ¿Igi imaggosunna deyob Jehovaga sogega? Dule bautizar imaggedgi binsaalile, wargwengi na Jehovase goloed, ega sogega an begarbi arbadi gumogoye. Deyob Jehovaga sogsale, ega sognaiyobid, bebi unnila an Bab Dummadga guoye, be igarmar mamaidbarbi an ibmar imagdi gubaloye. Geb Jesus ibmar imagdi gusayob an ibmar imagdi gubaloye. Ar Jesus sogsad: “Ar dule wargwen an sabbinga gubiele na duggin san ieger gebed, […] aa dule anba dagodo, an sabbinga guodo” (Mateo 16:24). Dule Jehovaga sogsale an begarbi arbadi guoye, geb bautizar imasbalile, degiirbi geb unnila nabir Jehova ai nuedgala guoed, geb nabir Jehova sordagan ai nuedga gubaloed.

3. Dule bautizar imagged iduar, ¿ibu ibmar baid imagbalir gebe?

Be bautizar imagbiele bin be nueggwa Jehova igar durdaggweler gebed, mer be Jehova ibmar sogmaid bengubalir gebed (Hebreos 11:6 absogo). Bur be nueggwa Jehova igar durdagmaidbali, bar bibbisaar be Jehova benguosulid, bur bule be Jehova binar gudbaloed. Aa be bendaggoed, be Jehova igargi sunmagbi gudamogaga, geb e igarmar mamaidba be ibmar imagbi gudabaliga (2 Timoteo 4:2; 1 Juan 5:3). Ar dule, ‘Bab Dummad sogedba ibmar imagdi gudele’ Jehovaga sogbi gudagoed an begarbi arbadi guoye, geb bautizar imagbi gudabaloed (Colosenses 1:​9, 10). a

 NUEGGWA WE IBMAR DURDAGMARGOLO

4. Jesus igi bautizar imasa, ibu igargi anmar odurdagge

Be wisgubiele Jesus igi bautizar imasa, Mateo 3:​13, 17 se absomalo. Sorba we ibmargi sunmagmarbalo:

• Igi wegine soglenai, ¿Jesus goe un bautizar imasdibe?

• ¿Unnila binsa bibbi e nonogi dii eyosmardibe? Degidde, ¿igi nue bautizar imassunna?

Bautizar imasgu Jesus, Bab igargi sunmaggedgi arbaded. Lucas 3:​21, 23 se geb Juan 6:​38 absomalo, we ibmargi sunmagmarbalo:

• Bautizar imasad sorba, ¿Jesus bur ibu imaggedgi arbadi gusa?

5. Nuediled be bautizar imaggedgi binsamogar

Gebbeundi sun be gwen Jehovagarbi arbadi gued na iddosuliled, gwen bautizar saed be na iddosurbaliled. Auggi, be nueggwa Jehova igar durdagmaidba be dagnoniggoed Jehova dule nued dae, aabali be bautizar imagbi gudamogoed. Dagmaloena, abar dulemar ibu imasmala bautizar imaggega, VIDEO dagmalo.

Juan 17:3 (TNM) geb Santiago 1:5 absomalo, we ibmargi sunmagmarbalo:

• Dule bautizar sabiele, ¿bin ibu imaggweler gebe?

1. Bautizar imagged idu anmar Jehovaga sogoed, an begarbi arbadi gumogoye.

2. Dule bautizar imasar mag daglegoed bad Jehovaga sogsa an begarbi arbadi guoye.

 6. Be bautizar imasale, Jehova sordaganba be aggamogoed

Be bautizar imasale, bela neg dirbimaggar Jehova sordagan bugwadba be aggamogoed. Dulemala, wagmala, mergimala, bela anmar na emarbi Bab igar durdag buggwad, bela anmar alamagdidiidbibalid nueggwa Biblia sogedba igar imaggega. Salmo 25:14 geb 1 Pedro 2:​17 absomalo, we ibmargi sunmagmarbalo:

• Be bautizar imasale, ¿Jehova be ibuga guoye Bibliagi soglenai? ¿Jehova sordagan igi be imagmarmogoe?

 WE IGARGI SUNMAGLESAD

Jesus sogsad, dule e sordaga gubiele bautizar saer gebye. Be bautizar sabiele, mer be bibbisaar Jehova benguer gebed, Jehova sogedba be igar imagdibalir gebed, geb be Jehovaga sogbalir gebed, an begarbi arbadi gumogoye.

Ibu be durdasa

• Bautizar saedye sogleged, ¿ibu obare? ¿Ibigala anmar bautizar saed abelege?

• Dule bautizar imagnaile, ¿igi bad Jehovaga sogsa mag daglegoe?

• Dule, Jehovaga soged idu an begarbi arbadi guoye, geb bautizar imagbalid idu, ¿bin ibu imaggweler gebe?