Neg aggar gunoniggir dulemar wisgubi guardaed, “¿Ibigala deyob ibmar gusa?”. Bibliagindi we ibmar nueggwa soglenaid.

1. ¿Nia ibu imasa neg oissogega?

Nia sagla Satanas, Bab Dummadgi agbidsad. Satanas abegensoggua dulemar eba aggaed, aagala Adan yardasad, Eva yardasbalid, wemar Bab Dummadgi agbinmarmogaga. Aagala, Evaga gaggansasad (Génesis 3:​1-5). Nia imasad, Eva binsaega, Bab Dummad egi ibmar nuegan oduggumaye. Degsoggu, ega sogsayob gusad, dulemar Bab Dummad sogedba igar imagsulile, bur yeer iddodi gusmalarye. Nia, Evaga sogsagu Bab Dummad sogedba be igar imagsulir be burgosurye, deunni, Nia gebbe gaggansaded. Aagala, Bibliagi soglenaid, Nia ‘gusgu gaggansaerbad, dulemar gaggansamalad e babbalid’ (Juan 8:44).

2. Adan, Evabogwa, ¿ibu imasmala?

Jehova bibbisaar Adangi, Evagi ibmar nallegumasulinad. Wemarga sogsanad, ibu sabbi durba bemar gunbie, be iddollegedba nabir bemar na gunmarye, auggi, unnila sabbi wargwen gwissidsedi mer assamaloye (Génesis 2:​15-​17). Wemardi agga aa sabbi san gunnedgi binsaarmalad. Degsoggu, Eva, “sabbi san gwadsagu, gudsad”, geb sorba Adan “gudsamogad” (Génesis 3:6). Degsoggu, ebobela Jehova sogedba igar imassurmalad. Adan, Eva, dule isguedsurmalansoggua, ibmar isgana imagged egi nasurmalanad. Nue Bab igar wisi Bab igargi annasmarsoggua, isgusmarsunnad, na wargwengi ibmar imaggedgi binsadmarbalid. Weyob ibmar imasmaladbali, dummad wiledmarsunnad (Génesis 3:​16-​19).

3. Adan, Evabo weyob ibmar imasmaladbali, ¿igi anmar eba galesmarmoga?

Adan, Evabo, Bab igargi yolenonimargua, isgusmarsunnad, degsoggu, bela e mimmiganse isgued ogwanonimarmogad. Adangi sunmaglenaidgi Bibliagi weyob soglesad: “Isgued dule wargwengi we nabnegse dognoniggid. Degine, isguedba burgwed igar nonibalid, degiidbali, bela dulemar burgwedbi gunonisunnad” (Romanos 5:12).

Anmar sergan anmar idu isgusadbali, inbaggwa anmar noar ibmar imagdedamogad, aagala, anmarga igar aburuddasunnad. Inbaggwa dule bamalad noar ibmar imasadba anmarga igar aburuddabalid. Aagala, inbaggwa sun anmar uggiar burgwed amibalid, bia anmar gudiidgindibe (Eclesiastés 9:​11 absogo).

 NUEGGWA WE IBMAR DURDAGMARGOLO

4. Doa nuggi neg isgusa

Abar dulemar binsadaed, Bab Dummad anmarga neg idumaye. ¿Ar nabirdibe? VIDEO dagmalo.

Santiago 1:13 geb 1 Juan 5:​19 absomalo, we ibmargi sunmagmarbalo:

• Igi be soge, ¿Bab Dummad nuggi neg isgunadibe?

5. Nia neg idumaidba neg isguded

1. Adan, Evabogwa isgued saddemalanad, neg yeer daglegedgi gudimarbalinad, auggi Niaba igar imasmaladbali, Jehovagine agbidsamalad.

2.   Adan, Evabo, Jehovagi agbidsamaladbali, we nabneggi isgued dognoniggid, wile iddoged dognonibalid, burgwed igar dognonibalid.

3. Jehova anmarga isgued obelogoed, wile iddoged obelogoed, burgwed obelobaloed. Gannar dulemar isgued sadde gumaloed, neg yeer daglegedgi gudi gumarbaloed.

6. Anmarga neg aggar gudele, Jehova wile iddomadaed

¿Anmarga neg aggar guder, Jehova basur anmar dagmadadibe? Dagmaloena, rey David igi sogsa, apostol Pedro igi sogsamoga. Salmo 31:7 geb 1 Pedro 5:7 absomalo, we ibmargi sunmagmarbalo:

• Bibliagi soglenaid Jehova anmar iemasurye, ¿bule Jehova anmar binar iddollesunna?

 WE IGARGI SUNMAGLESAD

Satanas, Adan, Eva wemar nuggi bela beladse neg isgusnaid. Anmarga neg aggar guder Jehovadi anmarba wile iddomadaed. Isse nabbid Jehova anmarga neg nudaggega.

Ibu be durdasa

• ¿Nia igi Evagala gaggansasa?

• Adan, Evabo weyob ibmar imasmaladbali, ¿igi anmar eba galesmarmoga?

• ¿Igi anmar wisi, anmarga neg aggar guder Jehova anmarba wile iddomadae?