LECCION 31

Bab Dummad, ¿gobierno nigmodibe?

IBU GAGGAB BE IDDOBIE

Bibliagi Bab Dummad gobiernogi bur sunmaglenadaed. Jehova imaggoed, e gobierno anmarga nabbaneg yeer dagle imaggega. ¿Doa we gobierno sisassunna? ¿Igi anmar wisi, we gobierno bad arbasii? ¿Ibu ibmar bad imagmai? ¿Yoogidse ibu ibmar imagbaloe? We lecciongi we ibmargi sunmaglegoed, sorba leccionmar sogbo daniggoedgi anba we ibmargi sunmaglebaloed.

1. Bab Dummad, ¿gobierno nigmodibe? ¿Doa we gobiernogi Reygala sii?

Bab Dummad na gobierno nigmogad, ee na we gobierno sisad. Jesucristo we gobiernogine, nibneggi Reyga siid (Mateo 4:17; Juan 18:36). Bibliagi soglenaid: Jesus “e neg semai guoedi, gwen berguosulid” (Lucas 1:32, 33). Jesus, Bab Dummad gobiernogi Reyga sisoggua, aadi bela anmarga neg idusii guoed.

2. ¿Jesus, doamarbo neg idusii?

Jesus walagwen neg idusisulid. ‘Bela dulemar ablis aggar aggarmalad, dulemar gaya aggar aggar sunmagmalad, dulemar yar baid baidginmalad neg semarmogoed’ (Apocalipsis 5:9, 10). Jesus nabbaneggi gudi gusad aggale, millonba mergu dulemar eba aggamamaid, e sordaganga gumamaid. Auggi, ¿bergwable we dulemar babneggi Jesusbo arbamarmogodibe? Suli, unnila 144.000 mergu dulemar babnegse namaloed, Jesusbo neg semai gumalaga (Apocalipsis 14:1-4 absogo). Bamalad Cristo sordagandina, we nabbaneggi gudi gumaloed, aamardina, neg seosurmalad (Salmo 37:29).

3. ¿Ibigala Bab Dummad gobierno bur nuedi, dulemar gobiernoba?

Abar dummagan neg dagmamaidi, neg nudaggedgi binsadamarmoganad, auggi, geg bergwable neg nudagdamalad. Ar suiddi megwissurdamalad, sorba bamalad nagnonidamarmogad, sun aamardi neg nudaggedgi binsasulir binsasurmalad. Auggi Jesusdina, Bab Dummad gobiernogi Reyga siidi, adi dule baid bar anar signoniggosulid. Bab Dummad sogsad, ‘we Reygi bibbisaar dule baid obinosurye’ (Daniel 2:44). Jesusdi bela nabbaneg idusii guoed, unnila dule wargwennabi bendaggosulid. Ar Jesusdi gadi dulemar binarsoggua, sabsur emar imagsurbarsoggua, dulemar odurdagmogoed, eyobi damarmogaga (Isaías 11:9 absogo).

NUEGGWA WE IBMAR DURDAGMARGOLO

Wegine be durdaggoed, ibigala Bab Dummad gobierno bur nuedi, dulemar gobiernoba.

4. Rey yeer gangued niggad bela nabbaneg idumai guoed

Bela nabbaneggi dummagan megdanimaladbali, Jesucristo bur yeer ibmar wisid, bur yeer gangued nigbalid. Mateo 28:18 absomalo, we ibmargi sunmagmarbalo:

¿Ibigala Jesus bur yeer gangued nigga, bamalad gobiernomarba?

Dulemar gobiernomardi bela neg dirbimaggar neg idumamasurdaed, unnila na e neggweburginbi neg idumamadaed, geb suiddi neg idumai gussurdamarbalid. ¿Bab Dummad gobierno deyob neg idumai gumogodibe? Daniel 7:14 absomalo, we ibmargi sunmagmarbalo:

¿Ibigala Bab Dummad gobierno bur nuedi?
Bab Dummad gobiernodi bela nabbaneg idusi guosoggua, ¿ibigala bur nued guoe?

5. Gobiernomar bela obelolemaloed

¿Ibigala Bab Dummad gobierno, dulemar gobierno anar sigwed abelege? VIDEO dagmalo, we ibmargi sunmagmarbalo:

VIDEO: ¿Bab Dummad, gobierno nigmodibe? (aagi sualed) (1:41)

Gobiernomala, ¿igi dulemar wioddamala?

Eclesiastés 8:9 absomalo, we ibmargi sunmagmarbalo:

¿Bule nue Bab Dummad gobierno, dulemar gobiernomar anar sigwed abelege? ¿Ibigala deyob be soge?

6. Bab Dummad gobiernogi arbamaloeddina, wile anmar dagmaloed

Anmar Rey, Jesus, we nabbaneggi anmaryob wiledi gusmosoggua, ‘wile anmar daggoed’ (Hebreos 4:15). Jehova, 144.000 mergu dulemar susbalid, omegana, massergana, inniggi e sogedba nanadi gusmalad, aamala Jesusbo reygala arbamarmogoed. We dulemar neggwebur soggwennaginmaladbisulid, ‘ablis aggar aggarmalad, gaya aggar aggar sunmagmalad, yar baid baidsigmaladid’ (Apocalipsis 5:9).

Jesus, geb Jesusbo arbamaloedi anmaryob wiledi gusmarmogad. ¿Ibigala bur nued guoe aamar anmarga neg seogu?

Diggasurgus Jehova dulemar wealid, omegana, massergana, Jesusbo arbamalaga, unnila neggwebur soggwennaginmaladbisulid.

7. Bab gobierno igarmar bur nueganad, dulemargadba

Bela gobiernomar igar mesedbiid, na e dulemar bendaggega. Bab Dummad gobierno na igarmar mesismogad, e sordagan eba igar imagged abelemarmogad. 1 Corintios 6:9, 11 se absomalo, we ibmargi sunmagmarbalo:

Bela dulemar we versiculogi ibmar soglenaidba ibmar imadmalale, ¿igi neg gudoe? a
¿Ibigala nue abelege, dulemar, Bab gobierno sordaga gubiele, Bab sogedba igar imagged?
¿Igi anmar wisi, dulemar, Jehova sogedba igar imagsurmalad, nabir na e daed ogwasmalale? (Versiculo 11 dagmalo).

Bela gobiernomar igar mesedbiid, na e dulemar bendaggega. Bab Dummad gobierno na igarmar mesismogad, e sordagan bendaggega. Auggi, Bab Dummad igarmardi bur nueganad.

ABAR SOGDAMALAD: “¿Sana degidde Bab Dummad neg nudaggosunna?”.