LECCION 34

¿Igi mag daglegoe be nue Jehova sabe?

IBU GAGGAB BE IDDOBIE

Biblia durdaded aggale Jehova aiga be guded. Jehova ai nuedga be gubimo an sogdo. Mer iego, Jehova dagsundibe be gadi e binale, bur bule be binar gudmogoed, be bendagmai gubaloed. Auggi, ¿igi mag daglesarsunna be nue Jehova sabe?

1. ¿Igi mag daglesale be nue Jehova sabe?

Be Jehova sogedba igar imagdaele mag daglegoed, be nue Jehova sabe (1 Juan 5:3 absogo). Auggi, Jehova anmargi naisurbalid anmar eba igar imaggega. ¿Ibigala? Ar Jehova abeged anmar nabbiragwadba eba igar imagged, eba nue igar imagbiedgi (Romanos 6:17). Jehova abesulid, dule bamalad begi alamagnaidba be eba igar imagged, bur abeged be e sabedba eba igar imagged. Degsoggu, seccion 3 gi, geb 4 gi be ibmar durdaggoed be bendaggoed, nabir be nuedgi Jehova sogedba igar imagdi guega, ibu ibmar Jehova yeer dagdae, be aa ibmar imagdi guega, geb ibu ibmar Jehova isdar dagdae, mer be aa ibmardi imaggega.

2. ¿Ibigala inbaggwa undar guardae Jehova sogedba igar imaggega?

Bibliagi soglenaid: “Dule inniggi gudiid, bonigan buggidar niggued” (Salmo 34:19). Ar bela anmar noedbiid. Anmarga ibmar ibigwensur gusurdaed, sun anmar mani sadde gudagoed, sun dule bamalad wis aggar anmar imagbalid. Deyob anmarga neg gualile, undar guleardaed Jehova sogedba ibmar imaglegega. Bur yogasaar ibmar imaglebi guleardaed. Auggi, deyob beg neg gualir be alamagsundibe bur Jehova sogedba ibmar imaggega, aagine mag daglegoed bela beladse be Jehova sabe. Degiile, mag daglebaloed bela beladse be Jehova igarmar binale. Be, Jehova sogedba nueggwa igar imagdaele, Jehova bibbisaar be iegosurmogad (Salmo 4:3 absogo).

NUEGGWA WE IBMAR DURDAGMARGOLO

Wegine be durdaggoed, ibigala Jehova abege anmar eba igar imagged, geb ibu anmar bendaggoe nabir anmar nueggwa eba igar imaggega.

3. Nia igi be nig sogsa

Bibliagine, libro Jobye nugadgi soglenaid igi Nia Job nig sogsa, igi dulemar Jehovaga arbabimalad nig sogsabali. Job 1:1 geb 1:6, 2:10 se absomalo, we ibmargi sunmagmarbalo:

¿Ibigala Job, Jehova sogedba igar imagdaye Nia sogsa? (Job 1:9-11 dagmalo).
¿Igi Nia dulemar nig sogdii, igi Nia be nig sogdimoga? (Job 2:4 dagmalo).

Job 27:5b absomalo, we ibmargi sunmagmarbalo:

¿Igi mag daglesa Job nue Jehovaba nai?

Job, Jehovagi bangussulid, aabali mag daglesad nue Jehova sabe.

Be, Jehovag bangusurmogale, mag daglegoed be nue Jehova sabmoga.

4. Yeer iddo Jehova imaggo

Proverbios 27:11 absomalo, we ibmargi sunmagmarbalo:

Be eba igar imaggele, ¿Jehova igi iddogoe? ¿Ibigala yeer iddogoe?

5. Mer Jehovagi banguo

Jehova sogedba igar imagbiedba anmar, Jehova igargi sunmagbi guardaed. Anmarga ibmar ibigwensur gusulirdina, Jehovagi bangubisulidba anmar e igargi sunmagged indassurdaed. VIDEO dagmalo, we ibmargi sunmagmarbalo:

VIDEO: Dulemar be iddobisur gualir, mer gwayo (5:09)

¿Bule bega undar guardamoga Jehova igargi sunmagged?
Videogi igi soglenai be dagsa, ¿Grayson ibu imasa dobed osulogega?

Jehova ibmar yeer dagged be binarmogale, geb Jehova ibmar isdar daggeddi, be isdar dagdamogale, ibigwensur bega guoed Jehova sogedba igar imaggega. Salmo 97:10 absomalo, we ibmargi sunmagmarbalo:

¿Ibu ibmarmar Jehova yeer dagye be durdasa? ¿Ibu ibmarmardi Jehova isdar dagye be durdasa?
¿Ibu be nabir imasale, bur be ibmar nuegan imagged binar gumogaga, ibmar isgana imagged be isdar dagmogaga?

6. Jehova sogedba igar imagged nue anmar bendagged

Jehova sogedba igar imagged bur nuedid. Isaías 48:17, 18 absomalo, we ibmargi sunmagmarbalo:

¿Ar bule Jehova nue wisdadibe ibu ibmar bur anmarga nued guoe? ¿Ibigala deyob be soge?
Jehova igar durdaggedi, ¿bule be bendagmo be iddoge? ¿Igi be bendasdae?

ABAR SOGDAMALAD: “Aggarsulid igi an ibmar imagbie, ar Bab Dummad an dagmasulid”.